İki yüz ildən çoxdur istifadə olunan məşhur ürək dərmanı – "Diqoqksin" yenidən kardiologiyanın əsas müzakirə mövzularından birinə çevrilib.

Azmedinfo.az xəbər verir ki, Səhiyyə Nazirliyi Elmi-Tədqiqat Kardiologiya İnstitutunun direktoru, professor Gülnaz Dadaşovanın sözlərinə görə, Barselonada keçirilən "Heart Failure 2026" konqresində "Diqoqksin"lə bağlı mühüm elmi nəticələr açıqlanıb.

"DECISION" tədqiqatı və 9 mindən çox ürək çatışmazlığı olan pasiyentin iştirakı ilə aparılan irimiqyaslı analiz göstərib ki, digitalis qrupu preparatlarının aşağı dozada qəbulu xəstələrdə yarana biləcək ağır fəsadların qarşısını almağa kömək edir.

Professor qeyd edib ki, əldə olunan elmi nəticələri düzgün qiymətləndirmək olduqca vacibdir. "Bu, "Diqoqksin"in bütün ürək çatışmazlığı olan xəstələrə şamil edilməsi anlamına gəlmir. Əsas məsələ düzgün pasiyent seçimi, aşağı dozanın tətbiqi və müalicəyə fərdi yanaşmadır.

"Tibbdə yenilik hər zaman yeni bir molekul və ya yeni dərman kəşfi demək deyil. Kardiologiya daim inkişaf edir, biz bu yenilikləri dərindən öyrənir, ən uyğun olanını seçir və klinik praktikada tətbiq edirik.", - deyə həkim vurğulayıb.