Metformin 60 ildən artıqdır ki, tibbi praktikada geniş tətbiq olunur. Preparatın bu qədər uzun müddət əsas seçim olaraq qalması təsadüfi deyil, çünki o, yüksək effektivliyə malikdir, hipoqlikemiya riski yaratmır, çəki artımına səbəb olmur və qiymət baxımından olduqca münasibdir.

Azmedinfo.az xəbər verir ki, həkim-endokrinoloq, tibb üzrə fəlsəfə doktoru Oktay Hüseynovun sözlərinə görə, metforminin ən çox rast gəlinən mənfi xüsusiyyəti mədə-bağırsaq sisteminə göstərdiyi yan təsirlərdir: "Şişkinlik, qarında narahatlıq, köp, ürəkbulanma və xüsusilə ishal bəzi pasiyentlərdə müalicənin davam etdirilməsini çətinləşdirir. Bu cür hallarda uzadılmış təsirli metformin, yəni XR forması köməyə çatır".

Ekspert qeyd edib ki, adi metformin gündə iki dəfə qəbul edilir və həzm sistemində daha sürətlə sorulur. Metformin XR isə təsiredici maddəni qana tədricən buraxaraq mədə-bağırsaq şikayətlərini minimuma endirir. Xüsusilə adi metformini qəbul edərkən həzm problemi yaşayan xəstələr üçün "Siofor XR" və "Glucophage Long" kimi preparatlar uğurlu alternativ sayılır.

"Bununla belə, nəzərə almaq lazımdır ki, XR forması adi metformindən daha güclü deyil və qan şəkərini salmaq baxımından aralarında ciddi fərq yoxdur. Onun əsas üstünlüyü orqanizm tərəfindən daha rahat mənimsənilməsi və gündəlik qəbul asanlığıdır", - deyə həkim vurğulayıb.

Endokrinoloq onu da bildirib ki, praktikada adi forma mədə-bağırsaq narahatlığı yaratdıqda dozanı tədricən artırmaq, preparatı yemək zamanı qəbul etmək və ya XR formasına keçmək problemi əsasən həll edir. Eyni zamanda, metforminin uzunmüddətli istifadəsi zamanı orqanizmdə B12 vitamininin səviyyəsini də mütəmadi olaraq yoxlamaq vacibdir.