Azərbaycanda hipertenziya ilə mübarizə layihəsinə start verildi

02 Mart 2025

720

Azərbaycanda “Hədəf 130/80” adlı hipertenziya ilə mübarizə layihəsinə start verilib. Bu barədə məlumat tibb sahəsində çalışan şəxslərin iştirakı ilə keçirilən konfransda bildirib.

Azmedinfo.az xəbər verir ki, İcbari Tibbi Sığorta üzrə Dövlət Agentliyinin Tibbi xidmətlər və dərman vasitələri departamentinin rəhbəri Nərgiz Ağayeva çıxışında qeyd edib ki, zərərli vərdişlərə, qeyri-sağlam həyat tərzinə meyl, az hərəkətlilik qeyri-infeksion xəstəliklərin artmasına və cavanlaşmasına səbəb olur. İcbari tibbi sığorta çərçivəsində aparılan profilaktik müayinələr və erkən müalicə tədbirləri bu xəstəliklərin qarşısını almağa kömək edir.

TƏBİB-in İcraçı direktorunun müavini Araz Nəsirov isə vurğulayıb ki, bu layihənin əsas məqsədi, insanları qan təzyiqinə və qanda şəkərin səviyyəsinə nəzarət etmələri üçün sağlam həyat tərzinə çağırmaqdır.

Azərbaycan Respublikası Səhiyyə Nazirliyinin Səhiyyə siyasəti şöbəsinin müdiri Ramik Quliyev, Milli Məclisin Səhiyyə komitəsinin sədr müavini Rəşad Mahmudov, Heydər Əliyev Fondunun “Regional İnkişaf” İctimai Birliyinin Müraciətlərlə iş şöbəsinin müdiri Babək Tatlıyev, Ümumdünya Səhiyyə Təşkilatının Azərbaycan nümayəndəsi Hande Harmancı, Azərbaycan Kardiologiya Cəmiyyətinin sədri Ülvi Mirzoyev və "Servye Azərbaycan" şirkətinin direktoru Rişad Təhməzovun da çıxış etdiyi konfransda layihənin qeyri-infeksion xəstəliklərin profilaktikasında mühüm rol oynadığı qeyd edildi. İl ərzində davam edəcək bu kampaniya çərçivəsində əhali arasında maarifləndirmə aparılacaq və tibbi xidmətlərə əlçatanlıq artırılacaq.

Layihə Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB, “Regional İnkişaf” İctimai Birliyi, Azərbaycan Kardiologiya Cəmiyyəti və "Servye Azərbaycan" şirkəti tərəfindən həyata keçirilir.