Azmedinfo.az xəbər verir ki, fevralın 26-da keçirilən seminar, Xocalı faciəsi qurbanlarının xatirəsinin bir dəqiqəlik sükutla anılması ilə başlayıb. Tədbirdə Yeganə Abbasova, faciənin insanlığa qarşı törədilmiş ağır cinayətlərdən biri olduğunu və bu cür hadisələrin insan həyatının dəyərini bir daha xatırlatdığını vurğulayıb. Seminar zamanı beyin ölümü diaqnozunun qoyulması, diaqnostik üsullar, əlavə tədqiqat metodları və beynəlxalq standartlar haqqında geniş məlumat verilib. Yeganə Abbasova elektrofüzioloji testlər, beyin qan dövranını göstərən angiografiya, radioizotop skanlama və transkranial doppler ultrasəs müayinəsi kimi üsulların əhəmiyyətini izah edib. O, həmçinin beyin ölümü diaqnozunun tibbi və hüquqi aspektlərinə də toxunaraq, bunun çoxmərhələli bir proses olduğunu və yalnız ixtisaslaşmış komissiyanın rəyi əsasında qoyulmalı olduğunu qeyd edib. Tədbirin sonunda tələbələrin sualları cavablandırılıb və orqan donorluğunun əhəmiyyəti bir daha vurğulanıb.