İnstitutun elmi istiqamətləri və elmi işçilərin iş planı müzakirə edilib

06 Mart 2025

514

Azərbaycan Respublikası Səhiyyə Nazirliyinin Elmi-Tədqiqat Tibbi Bərpa İnstitutunda Elmi Şuranın iclası keçirilib.

Azmedinfo.az xəbər verir ki, institutun direktoru, t.e.d Mətanət Əfəndiyevanın sədrliyi ilə keçirilən iclasda, institutun elmi işlər üzrə direktor müavini, elmi şuranın üzvləri və elmi işçilər iştirak ediblər.

Öncə Mətanət Əfəndiyeva iclasın gündəliyinə uyğun olaraq institutun elmi istiqamətlərini, elmi işçilərin hazırladıqları mövzuların iş planının əsas müddəalarının müzakirə olunacağını bildirib.

Sonra institutun elmi işlər üzrə direktor müavini, t.ü.f.d Sevinc Rzayeva 2024-cü ildə institutun elmi fəaliyyətinin hesabatını və 2025-ci il üçün nəzərdə tutulan institut üzrə seminar məşğələlərinin planının təsdiqi təqdim edib.

Daha sonra 2025-2027-ci illər üçün planlaşdırılan "Qarabağ İqtisadi rayonunun kurortoloji potensialının öyrənilməsi" adlı mövzunun planının müzakirəsi (məruzəçi k.ü.f.d Rəna Musayeva) keçirilib. Səsvermədən sonra nəticə təsdiq edilib. Yekunda gündəlikdə olan məsələlər şura üzvləri ilə müzakirə edilib, irad və təkliflər bildirilib, qərarlar qəbul edilib.