Səhiyyə Nazirliyi Respublika QİÇS-lə Mübarizə Mərkəzinin Şəki regional laboratoriyasının həkim briqadası Qəbələ Rayon Mərkəzi Xəstəxanasında İnsanda İmmunçatışmazlığı Virusunun (İİV) erkən aşkarlanması məqsədilə müayinələr aparıb.

Azmedinfo.az xəbər verir ki, tədbirin əsas məqsədi İİV/QİÇS infeksiyasının vaxtında müəyyən edilməsi, profilaktik tədbirlərin gücləndirilməsi və əhali arasında maarifləndirmə işinin genişləndirilməsi olub.

Təcrübəli həkimlər tərəfindən iştirakçılara İİV-in yoluxma yolları, xəstəliyin kliniki xüsusiyyətləri, müayinə və müalicə metodları barədə ətraflı məlumat verilib. Mütəxəssislər vurğulayıblar ki, erkən diaqnoz və müvafiq müalicə tədbirləri xəstəliyin gedişatını nəzarətdə saxlamağa və yoluxmuş insanların həyat keyfiyyətini artırmağa kömək edir.

Bundan əlavə, tədbir çərçivəsində iştirakçılara İİV/QİÇS-ə dair maarifləndirici materiallar – broşurlar, bukletlər təqdim edilib, onların sualları cavablandırılıb. Həkim briqadası əhalini mütəmadi olaraq tibbi müayinələrdən keçməyə, sağlam həyat tərzini seçməyə və infeksiyadan qorunmaq üçün profilaktik tədbirlərə əməl etməyə çağırıb.

Bu cür tədbirlərin ölkə üzrə digər bölgələrdə də keçirilməsi nəzərdə tutulur. Məqsəd İİV/QİÇS-lə mübarizəni gücləndirmək, ictimaiyyəti maarifləndirmək və xəstəliyin yayılmasının qarşısını almaqdır.