Həyata nəfəs - Kistik fibrozla mübarizədə yeni üfüqlər

13 Mart 2025

1386

TƏBİB və Kistik Fibroz Xəstələrinə Yardım İctimai Birliyinin (KİFYİB) birgə təşkilatçılığı ilə Yeni Klinikada “Azərbaycanda Kistik Fibroz Günü” konfransı baş tutub.

Azmedinfo.az xəbır verir ki, konfransda Yeni Klinikanın direktoru Barat Yusubov, millət vəkili, Milli Məclisin Səhiyyə komitəsinin üzvü Pərvanə Vəliyeva, TƏBİB-in Təlim və tədqiqatlar departamentinin rəhbəri Teymur Mirzəbəyli, Səhiyyə Nazirliyinin Səhiyyə siyasəti şöbəsinin müdiri Ramik Quliyev, İcbari Tibbi Sığorta üzrə Dövlət Agentliyinin İctimaiyyətlə əlaqələr şöbəsinin müdiri Leyla Lətifova, ÜST-ün nümayəndəsi Elturan İsmayılov, Səhiyyə Nazirliyinin ekspert pediatrı Erkin Rəhimov və KİFYİB-in sədri Səadət Bayramova çıxış edərək kistoz fibroz xəstəliyinin artımının qarşısının alınması üçün diaqnostik müayinə üsullarının əlçatanlığı, ixtisaslı mütəxəssislərin cəlb olunması və kistoz fibroz mərkəzlərinin artırılmasının önəmini qeyd ediblər.

Direktor Barat Yusubov artıq icbari tibbi sığorta ilə bu xəstəliyin erkən müayinəsinin daha əlçatan olduğunu qeyd edərək “Tər testi” və əlavə bir sıra diaqnostik müayinələrin Xidmətlər Zərfinə daxil olduğunu bildirib. Direktor Yeni Klinikada kistoz fibroz xəstəliyinin diaqnozu və müalicəsi sahəsində ixtisaslaşmış mərkəzin mövcud olduğunu və mərkəzdə kistoz fibroz xəstələrinə hərtərəfli diqqət edilərək, xəstəliyin idarə olunması və onların həyat keyfiyyətinin artırılması üçün multidisiplinar yanaşma ilə xidmət göstərildiyini qeyd edib.

Daha sonra Yeni Klinikanın həkim-pulmonoloqu Çağla Xurşud Hüseynova, uşaq qastroenteroloqu Anar Tağıyev və endokrinoloq Azad Əkbərzadə təqdimatla çıxış ediblər.