Səhiyyə Nazirliyinin Elmi-Tədqiqat Mamalıq və Ginekologiya İnstitutunun (ETMGİ) təşkilatçılığı ilə “Yardımçı reproduktiv texnologiyalar: yaxşı məlum olan müalicə metodlarının yeni imkanları” mövzusunda elmi-praktik konfrans baş tutub.

Azmedinfo.az xəbər verir ki, tədbirin açılışında ETMGİ-nin direktoru, tibb elmləri doktoru, professor Cəmilə Qurbanova çıxış edərək sonsuzluğun müalicəsində köməkçi reproduktiv texnologiyaların (KRT) müasir tibbdə tutduğu mühüm yeri xüsusi vurğulayıb. O, bu texnologiyaların son illər ərzində inkişaf edən istiqamətləri və tətbiq sahələri barədə ətraflı məlumat verib.

Konfrans çərçivəsində ETMGİ-nin Köməkçi Reproduktiv Sağlamlıq Texnologiyaları şöbəsinin müdiri, tibb üzrə fəlsəfə doktoru, dosent Xəyalə Təhməzi “İVF-də luteal fazanın dəstəyi: hansı yeniliklər var” mövzusunda təqdimatla çıxış edib. Dosent Təhməzi iştirakçılara bu sahədə aparılan son elmi tədqiqatlar və praktik təcrübələr əsasında formalaşan yeni yanaşmalar haqqında geniş məlumat verib.

Tədbirdə digər tanınmış mütəxəssislərin də çıxışları dinlənilib, aktual məsələlər ətrafında fikir mübadiləsi aparılıb. Konfrans maraqlı müzakirələr və sual-cavab sessiyası ilə yekunlaşıb.