Multidissiplinar əməkdaşlıq və pasiyent yönümlü yanaşma - Nadir xəstəliklərə dair konfrans keçirilib

18 Aprel 2025

436

Multidissiplinar əməkdaşlıq və pasiyent yönümlü yanaşma - Nadir xəstəliklərə dair konfrans keçirilib

Azərbaycan Respublikası Səhiyyə Nazirliyinin K.Y.Fərəcova adına Elmi-Tədqiqat Pediatriya İnstitutunda “Nadir Xəstəliklər: Şəxsi Təcrübəmiz” adlı beynəlxalq elmi-praktik konfrans uğurla baş tutub.

Azmedinfo.az xəbər verir ki, konfransın əsas məqsədi nadir xəstəliklər sahəsində elmi biliklərin və şəxsi təcrübələrin paylaşılması, multidissiplinar əməkdaşlığın gücləndirilməsi, eyni zamanda pasiyent yönümlü yanaşmaların təşviqi olub.

Tədbirin əvvəlində iştirakçılar vətən uğrunda canından keçən şəhidlərimizin, ulu öndər Heydər Əliyevin və 15 aprel anım tarixi ilə əlaqədar görkəmli oftalmoloq-alim akademik Zərifə xanım Əliyevanın əziz xatirəsi bir dəqiqəlik sükutla yad edilib. Ardınca Azərbaycan Respublikasının Dövlət Himni səsləndirilib. Zərifə xanım Əliyevanın anım günü ilə əlaqədar konfransda “Nadir rast gəlinən göz xəstəlikləri” mövzusunda məruzə dinlənilib.

Konfransın açılışı İnstitutun direktoru, dosent Aynur Poluxovanın nitqi ilə başlayıb. O, öz çıxışında tədbirin təşkil olunmasının əhəmiyyətini vurğulayaraq, nadir xəstəliklərin yalnız tibbi deyil, eyni zamanda sosial, psixoloji və emosional ölçüləri olan mürəkkəb bir məsələ olduğunu xüsusi qeyd edib: “Nadir xəstəliklər təkcə klinik praktikada deyil, həm də elmi araşdırmalarda önəmli yer tutur. Bu istiqamətdə beynəlxalq təcrübələrin öyrənilməsi, yeni tədqiqatların təşviqi və elmi nəticələrin praktikaya tətbiqi gələcək üçün əsas hədəfimiz olmalıdır.”

Daha sonra çıxış edən Səhiyyə Nazirliyinin Səhiyyə Siyasəti şöbəsinin müdiri Ramik Quliyev, səhiyyə naziri cənab Teymur Musayevin salamlarını çatdırıb. O, Konfransın təşkilini yüksək qiymətləndirib və iştirakçılara uğurlar arzulayıb. Nadir xəstəliklərin təkcə tibb elmi üçün deyil, bütövlükdə səhiyyə sistemi üçün xüsusi əhəmiyyət daşıdığını qeyd edib. Bu kimi tədbirlərin həm elmi, həm də praktiki baxımdan böyük önəm kəsb etdiyini vurğulayıb.

Daha sonra çıxış edən ATU-nin Elmi-Tədqiqatlar Departamentinin şöbə müdiri Fatimə Seyidbəyova çıxışında nadir xəstəliklərin elmi-tədqiqat sahəsində aktuallığını vurğulayaraq, bu cür tədbirlərin tibb elminin inkişafı, multidissiplinar yanaşmaların təşviqi və mütəxəssislər arasında təcrübə mübadiləsinin genişlənməsi baxımından xüsusi rol oynadığını qeyd edib. Konfransda Ə.Əliyev adına Azərbaycan Dövlət Həkimləri Təkmilləşdirmə İnstitutunun Pediatriya kafedrasının müdiri, t.e.d., prof. Rəqsanə Məmmədova, Azərbaycan Tibb Universitetinin Oftalmologiya kafedrasının müdiri, t.e.d., prof. Paşa Musayev, I Uşaq xəstəlikləri kafedrasının müdiri, t.e.d., prof. Rauf Bəylərov iştirak ediblər.

Konfrans çərçivəsində proqrama uyğun olaraq 3 əsas panel sessiya təşkil olunub. Sessiyalarda ümumilikdə 17 məruzə ilə çıxışlar olub.

Hər sessiyanın sonunda əməkdaşlıq etdiyimiz ölkələrdən Qazaxıstan Respublikası “Ana və Uşaq Mərkəzi” University Medical Center, Özbəkistan Respublikası, Daşkənd Pediatriya Tibb Universiteti, Qırğızıstan Respublikası, “Ana və Uşaqların Mühafizəsi Milli Mərkəzi”nin nümayəndələri və spikerləri məruzə ilə çıxış edərək mövzu ilə bağlı beynəlxalq təcrübələrini bölüşüblər.

Hibrid formatda 300-ə yaxın iştirakçının qatıldığı konfransın sonunda iştirakçılar keçirilən panel sessiyaların əhəmiyyətini və əldə olunan nəticələrin praktikada tətbiq imkanlarını yüksək qiymətləndiriblər. Sessiyalarda təqdim olunan çıxışlar, elmi tədqiqat nəticələri və təcrübə paylaşımları nadir xəstəliklər sahəsində gələcək əməkdaşlıqlara və yeni yanaşmaların formalaşmasına zəmin yaradıb.