2025-ci il aprelin 24-də Azərbaycan Tibb Universitetinin II Uşaq xəstəlikləri kafedrasının təşkilatçılığı ilə növbəti elmi vebinar keçirilib. Tədbir “2019–2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”nın iştirakçısı, Çin Xalq Respublikasının Nankin Tibbi Universitetinin doktorantı Səma Səmədlinin iştirakı ilə baş tutub.

Azmedinfo.az xəbər verir ki, elmi müzakirələr zamanı "Volfram sindromu: klinik təzahürlər, diaqnostika və müasir yanaşmalar" və "Qatlanmamış zülal reaksiyası: xəstəliklərdə rolu və müalicəvi perspektivlər" imövzularında ətrafında çıxışlar dinlənilib.

Səma Səmədli təqdimatında nadir genetik xəstəliklərdən olan Volfram sindromunun etiologiyası, irsi ötürülmə mexanizmi və erkən diaqnostikanın əhəmiyyəti barədə ətraflı məlumat verib. O, həmçinin genetik konsultasiyanın və molekulyar səviyyədə aparılan tədqiqatların bu sahədə perspektiv imkanlarından bəhs edib.

Digər təqdimatda isə qatlanmamış zülal reaksiyasının hüceyrədaxili homeostazın qorunmasında rolu və bu mexanizmin pozulmasının bir sıra neyrodegenerativ və metabolik xəstəliklərlə əlaqəsi diqqətə çatdırılıb. 

Vebinar zamanı iştirakçılar tərəfindən çoxsaylı suallar verilib, fikir mübadiləsi aparılıb və aktual tədqiqat istiqamətləri ətrafında müzakirələr keçirilib.

Tədbirin ali təhsil və elmi mübadilə sahəsində beynəlxalq əməkdaşlığın möhkəmləndirilməsi və gənc tədqiqatçıların elmi inkişafına dəstək baxımından əhəmiyyəti qiymətləndirilib.