Səhiyyə Nazirliyi Elmi-Tədqiqat Kardiologiya İnstitutunda (ETKİ) Elmi Şuranın növbəti iclası keçirilib. Elmi Şuranın sədri, ETKİ-nin direktoru, professor Gülnaz Dadaşova şura iştirakçılarını gündəlikdəki məsələlərlə tanış edib.

Azmedinfo.az xəbər verir ki, iclasda ilk olaraq institutun kiçik elmi işçisi Nigar Babayevanın tibb üzrə fəlsəfə doktoru elmi dərəcəsi almaq üçün 3218.01 – Kardiologiya ixtisası üzrə hazırladığı “Arterial hipertenziya xəstələrində hipotenziv müalicənin ürək və damarların remodelləşməsinə təsirinin qiymətləndirilməsi” mövzusunda dissertasiya işi müzakirə olunub.

Daha sonra “Ürəyin xronik işemik xəstəliyi və ritm pozğunluğu” şöbəsi və “Profilaktik Kardiologiya” şöbəsinin 2024-cü il üzrə illik hesabatları dinlənilib.

İclasda həmçinin nüfuzlu beynəlxalq jurnallarda çap olunan elmi məqalələrə görə müəlliflərin mükafatlandırılması məsələsi və elmi işçilərin attestasiyası ilə bağlı məsələlər müzakirə olunub.

Sonda gündəlikdə olan məsələlərlə bağlı müvafiq qərarlar qəbul edilib, görüləcək işlər və qarşıdakı hədəflər müəyyənləşdirilərək tapşırıqlar verilib.