İcbari Tibbi Sığorta üzrə Dövlət Agentliyi (İTSDA), TƏBİB və Türkiyə Əməkdaşlıq və Koordinasiya Agentliyi (TİKA) arasında əməkdaşlıq çərçivəsində Mərkəzi Neftçilər Xəstəxanasında “Yanıq yaralarının müalicəsi” mövzusunda beş günlük təlim proqramına start verilib.

Azmedinfo.az xəbər verir ki, təlimin əsas məqsədi yanıq xəstələrinin müalicəsində müasir tibbi protokolların tətbiqini təşviq etmək, tibb işçilərinin həm nəzəri, həm də praktiki biliklərini təkmilləşdirməkdir. Yanıqların effektiv müalicəsi və xəstələrin reabilitasiyasında beynəlxalq təcrübənin inteqrasiyası bu təşəbbüsün əsas prioritetlərindəndir.

Təlimin açılış mərasimində TƏBİB-in İcraçı direktorunun müavini Anar İsrafilov, İTSDA-nın Tibbi planlama departamentinin rəhbəri Hikmət İbrahimli, TİKA-nın Bakı Proqram Koordinatoru Hayrettin Özçelik, Türkiyənin uşaq cərrahiyyəsi üzrə tanınmış mütəxəssisi, cərrahiyyə tibb elmləri müəllimi dosent Dr. Sabri Demir, Mərkəzi Neftçilər Xəstəxanasının rəhbərliyi və tibb işçiləri iştirak ediblər.

Beş gün ərzində keçiriləcək proqram çərçivəsində yanıq patologiyalarının dərəcələrinə uyğun müasir yanaşmalar, ilkin tibbi yardımın prinsipləri, cərrahi müdaxilələr, dərin yanıqlarda istifadə olunan müalicə protokolları və pasiyentlərdə psixososial dəstək üsulları əhatəli şəkildə öyrəniləcək.

Bu cür beynəlxalq əməkdaşlıq və təcrübə mübadiləsi yerli səhiyyə sistemində keyfiyyətin yüksəldilməsi, həkimlərin ixtisas səviyyəsinin artırılması və xəstə məmnuniyyətinin təmin olunması baxımından mühüm addımdır.