Bakıda Ümummilli Lider Heydər Əliyevin xatirəsinə həsr olunmuş ənənəvi “Bakı Ürək Günləri” 9-cu Beynəlxalq Konqresi baş tutub.

Azmedinfo.az xəbər verir ki, konqresdə dünyanın 20-dən çox ölkəsindən 400-ə yaxın yerli və əcnəbi mütəxəssis iştirak edib. Onlar arasında tanınmış kardioloq və kardiocərrahlar, həmçinin bir sıra elmi-tədqiqat mərkəzlərinin nümayəndələri yer alıblar. Konqresin əsas məqsədi ürək-damar xəstəliklərinin profilaktikası, diaqnostikası və müalicəsində əldə olunan son elmi yeniliklərin paylaşılması, habelə beynəlxalq təcrübə mübadiləsinin təşkili olub.

Tədbirin açılışında çıxış edən Elmi-Tədqiqat Kardiologiya İnstitutunun direktoru, professor Gülnaz Dadaşova fəxri oturumun moderatoru kimi konqresin önəmini vurğulayaraq bildirib: “Ürək-damar xəstəlikləri bu gün qlobal səhiyyənin qarşısında duran ən ciddi problemlərdən biridir. Bu sahədə beynəlxalq əməkdaşlıq və elmi yeniliklərin paylaşılması olduqca vacibdir. “Bakı Ürək Günləri” bu baxımdan unikal platformadır.”

Tədbirdə xüsusi qonaqlar qismində dünyanın ən məşhur ürək-damar mütəxəssislərindən Böyük Britaniyanın Oksford Universitetindən Prof. Dr. David Taggart və Yaponiyadan Prof. Dr. Şiqeyuki Ozaki iştirak ediblər. 

Konqres çərçivəsində daha bir yenilik kimi, əməliyyatxanadan birbaşa canlı bağlantı ilə açıq ürək əməliyyatının gedişi nümayiş etdirilib. Bu təqdimat gənc həkimlər üçün həm tədris baxımından, həm də praktik biliklərin artırılması istiqamətində əhəmiyyətli addım kimi qiymətləndirilib.

Tədbir çərçivəsində həmçinin yerli mütəxəssislərin elmi çıxışları, poster təqdimatları və master-klasslar da təşkil olunub. Konqresin yekununda iştirakçılara sertifikatlar təqdim edilib.

“Bakı Ürək Günləri” beynəlxalq konqresi artıq 9 ildir ki, Azərbaycan tibb ictimaiyyəti ilə dünyanın aparıcı kardioloji cəmiyyətlərini bir araya gətirən mühüm bir platforma kimi fəaliyyət göstərir. Növbəti tədbirin 2026-cı ildə daha geniş formatda keçirilməsi planlaşdırılır.