2025-ci ilin may ayında Azərbaycan Respublikası Səhiyyə Nazirliyi K.Y. Fərəcova adına Elmi-Tədqiqat Pediatriya İnstitutunun (ETPİ) mütəxəssisləri bir sıra beynəlxalq tədbirlərdə fəal iştirak ediblər.

Dubayda beynəlxalq elmi təqdimat

Azmedinfo.az xəbər verir ki, 15–19 may 2025-ci il tarixlərində Birləşmiş Ərəb Əmirliklərinin Dubay şəhərində keçirilən 9-cu Beynəlxalq Tibb və Sağlamlıq Elmləri Konfransında ETPİ-nin həkim mütəxəssisləri Nuranə Hüseynova və Tükəz Məmmədova onlayn formatda çıxış ediblər. İnstitutun direktoru dosent Aynur Poluxova, elmi katib dosent Sevinc Nəsirova və həkim Nuranə Hüseynova tərəfindən “Rubinstein-Taybi syndrome in a child with Floating Harbor syndrome” mövzusunda elmi tədqiqat təqdim olunub.

Qırğızıstanda beynəlxalq konqres və təltif

23–24 may tarixlərində Qırğızıstan Respublikasının Bişkek şəhərində “Mamalıq-ginekologiya, pediatriya və uşaq cərrahiyyəsi sahəsində innovasiyalar” mövzusunda keçirilən beynəlxalq konqresdə ETPİ-nin direktoru dosent Aynur Poluxova açılış nitqi ilə çıxış edib, konfrans iştirakçılarına uğurlar arzulayıb. Konqres çərçivəsində institutun həkimi Gülnaz Ağayeva məruzəçi qismində çıxış edib, eləcə də ETPİ tərəfindən beş elmi məqalə təqdim olunub. Qarşılıqlı əməkdaşlığın göstəricisi kimi Aynur Poluxova Qırğızıstan Respublikası tərəfindən “АК НИЕТ ЭМГЕГИ УЧУН” (“Fədakar və səmimi əməyə görə”) medalı ilə təltif olunub.

Naxçıvanda beynəlxalq konfransa hazırlıq

29–30 may 2025-ci il tarixlərində Naxçıvan Dövlət Universiteti Tibb Fakültəsinin 25 illik yubileyinə həsr olunmuş “Cərrahi və mama-ginekoloji problemlərə multidissiplinar yanaşmalar” mövzusunda beynəlxalq konfrans keçiriləcək. Tədbirdə ETPİ-nin 9 həkim mütəxəssisi neonatologiya sahəsində aktual problemlərin elmi müzakirəsinə dair müxtəlif mövzularda çıxış edəcəklər. Eyni zamanda mütəxəssislərin xəstə baxışlarında iştirakı da nəzərdə tutulub.