Ana südü – Həyatın ilk və ən güclü peyvəndi!

Ana südü körpə üçün ən ideal və təbii qida mənbəyidir. Tərkibindəki zülallar, yağlar, karbohidratlar, anticisimlər və hormonlar körpənin inkişafı, immun sistemi və beyin funksiyalarının formalaşması üçün əvəzolunmaz rol oynayır. Ümumdünya Səhiyyə Təşkilatının (ÜST) tövsiyəsinə əsasən, körpələr ilk 6 ay ərzində yalnız ana südü ilə qidalanmalı, daha sonra isə 2 yaş və daha uzun müddətə qədər əlavə qidalarla birlikdə davam etdirilməlidir.

Azmedinfo.az olaraq anaların və uşaqların sağlamlığının qorunması naminə, ana südünün təbliğini davam etdirir və hər bir ananı körpəsini sağlam gələcəyə doğru süd ilə bəsləməyə təşviq edirik!

Ana südünün faydaları:

- İmmuniteti gücləndirir: Ana südü körpəni infeksiyalardan qoruyan anticisimlərlə zəngindir.

- Zehni inkişafı dəstəkləyir: Süddəki yağ turşuları beyin inkişafında mühüm rol oynayır.

- Xroniki xəstəlik riskini azaldır: Alergiya, piylənmə, şəkərli diabet və astma kimi xəstəliklərin qarşısının alınmasında effektivdir.

- Anaya da faydalıdır: Südvermə uşaqlıq qanamasını azaldır, doğuşdan sonrakı depressiyanın qarşısını alır və döş xərçəngi riskini aşağı salır.

Tibb mütəxəssislərinin tövsiyəsi:

Qadın məsləhətxanaları, doğum evləri və uşaq poliklinikaları hamiləlik dövründən etibarən analara düzgün qidalanma, südvermə texnikası və südün saxlanma qaydaları barədə ətraflı məlumat verməlidir. Hər bir tibb işçisi – pediatr, mama-ginekoloq və tibb bacısı – bu prosesdə maarifləndirici rola sahibdir.

Diqqət! Ana südünü əvəz edən məhsulların tez-tez və səbəbsiz yerə istifadəsi körpənin sağlamlığına mənfi təsir göstərə bilər. İstisna hallarda (məsələn, süd ifrazının tam olmaması və ya bəzi xəstəliklər) yalnız mütəxəssis məsləhəti ilə alternativlərə keçmək tövsiyə olunur.

Səhiyyə sektorunun rolu

Səhiyyə müəssisələri ana südünün təşviqi istiqamətində həm hamilə qadınlara, həm də yeni doğan körpələrin valideynlərinə maarifləndirici seminarlar, məlumat vərəqələri və həkim məsləhətləri təqdim etməlidir. Bu istiqamətdə hər il qeyd olunan Ana Südü ilə Qidalandırma Həftəsi mühüm fürsətə çevrilir.