30 may tarixində Badamdar Oteldə keçiriləcək elmi-praktik konfransda autizm spektr pozuntusuna dair müasir dövrün ən aktual elmi yanaşmaları təqdim olunacaq. Tədbirin əsas məqsədi autizmin çoxşaxəli səbəblərinə – genetik meyillərdən psixoloji vəziyyətlərə və qidalanma ilə bağlı mexanizmlərə qədər – müxtəlif sahələrin elmi əsaslara söykənən yanaşmaları ilə birgə nəzər yetirməkdir.

Azmedinfo.az xəbər verir ki, bu mühüm konfransın əsas təqdimatçılarından olan Azərbaycan Tibb Universitetinin II Uşaq Xəstəlikləri kafedrasının dosenti, Azərbaycan Pediatrlar Assosiasiyasının sədri, Avrasiya Uşaq Həkimləri Federasiyasının vitse-prezidenti, MDB dövlətlərinin Nadir Xəstəliklər üzrə Konsorsium Şurasının üzvü, tibb üzrə fəlsəfə doktoru Təranə Tağı-zadə "Neyroinkişaf pozuntuları olan pasientlərin bioetik problemləri" mövzusunda məruzə ilə çıxış edəcək.

Konfrans çərçivəsində iştirakçılar autizmin etiologiyası və müalicəsində müasir multidissiplinar yanaşmalarla tanış olmaq, həmçinin genetik risk amilləri, psixoloji dəstək metodları və qidalanmanın təsirləri barədə ətraflı məlumat əldə etmək imkanı qazanacaqlar.

Tədbir həm praktiki həkimlər, həm də bu sahəyə elmi marağı olan mütəxəssislər üçün nəzərdə tutulur.

İştirak edən şəxslərə rəsmi sertifikat təqdim olunacaq. Yer sayı məhduddur, buna görə də erkən qeydiyyat tövsiyə olunur.

Əlaqə və qeydiyyat üçün:
Telefon nömrəsi: 070 352 00 13
Telefon nömrəsi: 070 952 00 13

Konfransın təşkilatçısı: Lasomed