Ana südü ilə qidalanma həyatın ən erkən mərhələlərində uşağın sağlamlığını, inkişafını və sağ qalmasını təmin etməyin ən effektli yollarından biridir. O, diareya və pnevmoniya kimi xəstəliklərdən qoruyan ilk peyvənd rolunu oynayır.

Azmedinfo.az xəbər verir ki, “Ana südü ilə qidalanma həftəsi”ndə Ümumdünya Səhiyyə Təşkilatının icraçı direktoru Tedros Adhanom Qebreyesus və Birləşmiş Millətlər Təşkilatının Uşaq Fondunun (UNICEF) icraçı direktoru Katrin Rassel birgə bəyanat yayıblar.

Bəyanatda deyilir ki, ana südü ilə qidalanma üçün investisiya ayırmaq gələcəyə sərmayə qoymaq deməkdir. Bu gün yaşı altı aya qədər olan körpələrin yalnız 48%-i ana südü ilə qidalanır. Bu, ÜST-nin qarşıya qoyduğu 2030-cu ilə qədər 60 %-lik hədəfindən xeyli aşağıdır. Mütəxəssislər bunu gənc anaların, tibb işçilərinin və səhiyyə sistemlərinin üzləşdiyi ümumi çətinliklərlə əlaqələndirirlər.

Belə ki, dünyada milyonlarla ana ən çox ehtiyac duyduqları vaxt səhiyyə müəssisələrində vaxtında və keyfiyyətli yardım ala bilmir. Ölkələrin yalnız 1/5-i yeni doğulan analara qulluq edən həkim və tibb bacılarına körpə və erkən uşaqlıq problemləri üzrə vacib təlimlər keçirir. Bu o deməkdir ki, dünya üzrə əksər analar körpələrini necə əmizdirmək və digər qidalarla qidalandırmağa nə zaman keçirilməsi barədə lazımi məsləhətlər almadan xəstəxanaları tərk edirlər.

Yatırılan hər bir dolların 35 ABŞ dolları iqtisadi fayda gətirməsinə baxmayaraq, ana südü ilə qidalanmanın dəstəklənməsinə qoyulan investisiyalar kritik dərəcədə aşağı səviyyədə qalır.

Bu il “Ana südü ilə qidalanmanın prioritetləri: dayanıqlı dəstək sistemlərinin qurulması” devizi altında keçirilən “Ana südü ilə qidalanma həftəsi”ndə ÜST və UNICEF hökumətləri, səhiyyə liderlərini və tərəfdaşları körpələri yüksək keyfiyyətli ana südü ilə qidalandırmaq üçün sərmayə qoymağa çağırır.

""Ana südü ilə qidalanmanı dəstəkləmək üçün səhiyyə sistemlərinin gücləndirilməsi təkcə ictimai səhiyyənin vacibliyi deyil, həm mənəvi, həm də iqtisadi cəhətdən mühüm şərtdir. ÜST və UNICEF hər zaman olduğu kimi, heç bir ana və uşağı diqqətdən kənarda qoymayan dayanıqlı səhiyyə sistemləri qurmaq üçün ölkələri dəstəkləmək məramında sadiqdirlər" – deyə, adıçəkilən Bəyanatda diqqətə çatdırılır.