TƏBİB-in təşəbbüsü ilə bölgələrdə genişmiqyaslı “Qaraciyər həftəsi” layihəsi həyata keçirildi

19 Aprel 2025

742

“Qaraciyər sağlamlığı həftəsi” layihəsi uğurla icra olunub.

Azmedinfo.az TƏBİB-ə istinadən yazır ki, bu layihə çərçivəsində 800-ə qədər vətəndaşa 6600-dən çox tibbi xidmət göstərilib. Layihənin icrası zamanı bölgə həkimləri üçün qaraciyər xəstəliklərinin diaqnostikası və müalicəsinə müasir yanaşma mövzusunda seminar keçirilib. Eyni zamanda, layihədə uğurla iştirak edən həkim-mütəxəssislər TƏBİB-in İcraçı direktoru Vüqar Qurbanovun adından təşəkkürnamə ilə təltif ediliblər.

TƏBİB-in təşkilatçılığı və İcbari Tibbi Sığorta üzrə Dövlət Agentliyinin dəstəyi ilə “TƏBİB-in İxtisas gündəliyi 2025” proqramı çərçivəsində 19 Aprel - Ümumdünya Qaraciyər Gününə həsr edilən “Qaraciyər sağlamlığı həftəsi” layihəsi icra edilib. Layihə çərçivəsində Göyçay, Ucar, Kürdəmir və Zərdab rayonlarının vətəndaşları üçün tibbi xidmətlər təşkil olunub.

Layihə çərçivəsində Göyçay Rayon Mərkəzi Xəstəxanasında bölgə əhalisinə, o cümlədən müxtəlif sosial qruplardan olan vətəndaşlara paytaxtdan dəvət olunmuş ixtisaslı həkim mütəxəssislər tərəfindən tibbi xidmətlər göstərilib.

15-16 aprel tarixlərində baş tutan tibbi müayinələrdə iştirak edən tibbi heyət Bakı şəhərində fəaliyyət göstərən çoxprofilli tibb müəssisələri - Respublika Klinik Xəstəxanası, Nərimanov Tibb Mərkəzi, Sumqayıt Tibb Mərkəzi, Respublika Dəri Zöhrəvi Mərkəzi, Yeni Klinika və Bakı Baş Səhiyyə Mərkəzinin həkimlərindən ibarət olub.

Ümumilikdə 800-ə qədər vətəndaşa qastroenteroloq, terapevt, dermatoloq, infeksionist, hematoloq, pediatr həkimlər tərəfindən 6600-dən çox tibbi xidmət göstərilib.

Qeyd edək ki, layihə çərçivəsində bölgədə yaşayan həssas əhali qrupuna daxil olan müharibə iştirakçıları və şəhid ailələrinin üzvləri də tibbi müayinələrə cəlb olunub.

Həkim-mütəxəssislər vətəndaşlara zəruri tibbi məsləhətlər verib və ətraflı müayinə üçün müvafiq tibb müəssisələrinə yönləndiriblər.

Həmçinin layihə çərçivəsində seminar və tibbi maarifləndirmə tədbirləri keçirilib

“TƏBİB-in ixtisas gündəliyi 2025” proqramının “Qaraciyər sağlamlığı həftəsi” layihəsi çərçivəsində Göyçay Rayon Mərkəzi Xəstəxanasında Göyçay, Ucar, Kürdəmir, Zərdab rayon mərkəzi xəstəxanalarının həkimləri üçün qaraciyər xəstəliklərin diaqnostikası və müalicəsinə müasir yanaşma mövzusunda seminar keçirilib.

Tədbirin açılışı Göyçay Rayon Mərkəzi Xəstəxanasının direktoru Talıb Məmmədov və “Qaraciyər sağlamlığı həftəsi” layihəsinin rəhbəri Hicran Kazımovanın çıxışları ilə baş tutub.

Seminar paytaxtda yerləşən tibb müəssisələrində fəaliyyət göstərən müxtəlif ixtisaslı həkim-mütəxəssislərin çıxışları ilə davam edib.

Sonda layihədə uğurla iştirak edən həkim-mütəxəssislər TƏBİB-in İcraçı direktoru Vüqar Qurbanovun adından təşəkkürnamə ilə təltif ediliblər.

“Qaraciyər sağlamlığı həftəsi” layihəsi çərçivəsində müayinə və müalicələrin təyin olunması tədbirləri ilə yanaşı, vətəndaşların maarifləndirilməsi üçün söhbətlər aparılıb, xəstəliklərin ağırlaşmalarının qarşısının alınmasında erkən diaqnostikanın önəmi vurğulanıb.