Səhiyyə Nazirliyi K.Y.Fərəcova adına Elmi-Tədqiqat Pediatriya İnstitutunun həkim mütəxəssisləri Türkiyənin Ankara şəhərində 1-2 mart 2025-ci il tarixlərində keçirilən "Gevher Nesibe 14. Uluslararası Sağlık Bilimleri Kongresi" çərçivəsində müxtəlif mövzularda təqdimatlarla onlayn çıxış ediblər.

Azmedinfo.az xəbər verir ki, təqdimatlar zamanı həkimlər pediatriya sahəsində aktual mövzulara toxunaraq, tibbi yenilikləri, müasir diaqnostika və müalicə metodlarını müzakirə ediblər. Hər çıxışın sonunda qarşılıqlı fikir mübadiləsi aparılıb, elmi diskussiyalar təşkil olunub və iştirakçılar arasında təcrübə mübadiləsi həyata keçirilib.

Konqresin əsas məqsədi səhiyyə elmləri sahəsində beynəlxalq əməkdaşlığın genişləndirilməsi, elmi biliklərin paylaşılması və səhiyyə xidmətlərinin keyfiyyətinin yüksəldilməsi üçün yeni həll yollarının işlənib hazırlanmasıdır. Tədbir çərçivəsində müxtəlif ölkələrdən gələn tibb mütəxəssisləri öz elmi tədqiqatlarını təqdim edərək, gələcək əməkdaşlıq imkanlarını müzakirə ediblər.

Azərbaycanlı həkimlərin bu nüfuzlu konqresdə iştirak etməsi ölkəmizin səhiyyə sahəsində beynəlxalq arenada tanınmasına və elmi nailiyyətlərin paylaşılmasına mühüm töhfə verir.