Ümumdünya Səhiyyə Təşkilatının (ÜST) son açıqlamasına görə, bu gün dünyada təxminən 2,2 milyard insan hələ də təhlükəsiz içməli suya çıxış imkanından məhrumdur. Həyati resurs kimi suya tələbat artdıqca problem daha da kəskinləşir və qlobal gündəmin əsas mövzularından birinə çevrilir.

Azmedinfo.az xəbər verir ki, BMT-nin məlumatına əsasən, Stokholmda avqustun 28-dək davam edəcək 35-ci Ümumdünya Su Həftəsi “İqlim fəaliyyəti üçün su” devizi altında keçirilir. Tədbirin məqsədi – su ilə iqlim dəyişikliyi arasındakı sıx əlaqəyə diqqət çəkməkdir.

Təhlükəsiz içməli suya çıxış yalnız insanların sağlamlığı üçün deyil, həm də sosial-iqtisadi inkişaf, enerji təhlükəsizliyi, ərzaq istehsalı və ekosistemlərin qorunması baxımından həyati əhəmiyyət daşıyır. Su təchizatının möhkəmləndirilməsi getdikcə qızmarlaşan dünyada iqlim dəyişikliyinə uyğunlaşma səylərinin də əsas istiqamətinə çevrilir.

Suya çıxış imkanlarının yaxşılaşdırılması xüsusilə dənizə çıxışı olmayan inkişaf etməkdə olan ölkələrdə (LLDC) icmalar üçün yeni sosial-iqtisadi imkanlar yaradır.

Avqustun 26-da BMT-nin su və kanalizasiya sahəsində fəaliyyətini əlaqələndirən “UN-Water” strukturu Dayanıqlı İnkişaf Məqsədlərinə uyğun olaraq “hamı üçün təhlükəsiz su və sanitariya” hədəfi istiqamətində əldə edilən təcrübələri bölüşmək üçün müxtəlif ölkələrin nümayəndələrini bir araya gətirəcək. Sessiyada Butan, Ruanda və Səudiyyə Ərəbistanının bu sahədə əldə etdiyi uğurlar nümunə kimi təqdim olunacaq.

Tədbirin açılışında vurğulanıb ki, təhlükəsiz su və sanitariya xidmətlərinin olmaması insanların sağlamlığına, rifahına və ləyaqətinə ciddi mənfi təsir göstərir. Bu vəziyyət xüsusilə qadınlar və qızlar üçün daha böyük çətinliklər yaradır. Çirklənmiş su və sanitariya problemləri isə yoxsulluqla mübarizə, eləcə də yoluxucu xəstəliklərin qarşısının alınması istiqamətində aparılan səyləri zəiflədir.

Konfransın daha bir sessiyasında su-kanalizasiya təminatında maliyyələşmə problemləri müzakirə ediləcək. “UN-Water” və tərəfdaş qurumlar donorlar və digər əsas tərəfdaşlarla birgə innovativ maliyyələşdirmə mexanizmlərini araşdıraraq mövcud boşluqları doldurmağa çalışacaqlar. Məqsəd – su təchizatının daha davamlı və hər kəs üçün əlçatan olmasıdır.