Vaksinasiyaya etimadın artırılması üçün tibb işçilərinin kommunikasiya bacarıqları gücləndirilir

05 İyun 2026

ÜST Avropa Regional Bürosu tərəfindən “Tibb işçilərinin vaksinasiyaya dair kommunikasiya təlimi” mövzusunda vebinar keçirilib.

Azmedinfo.az-a verilən məlumata görə, vebinarda ÜST/Avropa tərəfindən hazırlanmış vaksinasiyaya dair kommunikasiya üzrə təlim paketi təqdim olunub, həmçinin Üzv Dövlətlər arasında tibb işçilərinin kommunikasiya bacarıqlarının gücləndirilməsi üzrə praktiki təcrübə mübadiləsi üçün platforma yaradılıb.

Azərbaycanda 2024–2025-ci illərdə həyata keçirilmiş vaksinasiyaya dair kommunikasiya təliminin qiymətləndirilməsi üzrə tədqiqatın əsas nəticələri də təqdim olunmuşdur. Nəticələr tibb işçilərinin bilik, inam və kommunikasiya bacarıqlarında, eləcə də valideynlərin təcrübəsi və vaksinasiyanın qəbulunda müsbət dəyişiklikləri göstərmişdir. Bu, bir daha təsdiqləyir ki, kommunikasiyaya yönəlmiş bacarıqların gücləndirilməsi effektiv immunizasiya proqramlarının əsas sütunlarından biridir.

Azərbaycan, İtaliya, Macarıstan və Rumıniya nümayəndələri vaksinasiya kommunikasiyasının tibbi tədris proqramlarına inteqrasiyası üzrə təcrübələrini bölüşmüşlər. Azərbaycan Tibb Universitetinin Tibb və Sağlamlıq Elmləri Təhsili kafedrasının baş müəllimi Dr. Samira Məmmədovaya ölkənin təcrübəsini təqdim etdiyinə görə səmimi təşəkkürümüzü bildiririk.

Eyni zamanda, Avropanın Xəstəliklərə Nəzarət və Profilaktika Mərkəzi (ECDC) vaksinasiya kommunikasiyası üzrə təhsil portalını təqdim edib.

Vebinar ÜST-nin Avropa Regionunun bütün 53 Üzv Dövlətindən 400-dən çox iştirakçını - immunizasiya proqramlarının rəhbərlərini, ilkin səhiyyə və ictimai səhiyyə qurumlarını, akademik və tədris müəssisələrini, ÜST ofislərini, ECDC və digər tərəfdaşları bir araya gətirib.

Tibb işçiləri Avropa Regionunda vaksinlə bağlı ən etibarlı məlumat mənbəyi olaraq qalır. Onların empatiya ilə dinləmək, narahatlıqları cavablandırmaq və etimad qurmaq bacarıqlarının gücləndirilməsi vaksinlərə etimadın artırılması, vaksin əhatəsinin yüksəldilməsi və immunizasiya proqramlarının dayanıqlığının təmin edilməsi üçün vacibdir