2019–2025-ci illər ərzində 10 ölkə insanlarda taun xəstəliyinə şübhəli yoluxma halları barədə Ümumdünya Səhiyyə Təşkilatına (ÜST) məlumat verib. ÜST-nin hesabatına görə, bu ölkələrin altısında yoluxma halları təsdiqlənib.

Azmedinfo.az təşkilatı məlumatına istinadən yazır ki, hesabat dövründə ÜST ümumilikdə 3 847 şübhəli taun yoluxması və 423 ölüm halı barədə məlumat alıb. Ölüm göstəricisi 11 faiz təşkil edib.

ÜST eyni zamanda vəba ilə bağlı vəziyyətin də pisləşdiyini açıqlayıb. Bildirilib ki, 2025-ci ildə vəbadan ölüm halları əvvəlki illə müqayisədə 30 faiz artıb. Dünyada qeydə alınan bütün vəba yoluxmalarının və ölüm hallarının təxminən 90 faizi Anqola, Banqladeş, Konqo Demokratik Respublikası, Nigeriya, Cənubi Sudan, Sudan və Yəmənin payına düşür.

Vəbanın ən böyük yükü ÜST-nin Afrika regionunda qeydə alınıb. Burada 2024-cü illə müqayisədə yoluxma halları 34 faiz, ölüm halları isə 58 faiz artıb.

Hesabatda vəbaya qarşı peroral peyvəndlərin istehsalında ciddi artımın olduğu da vurğulanıb. Belə ki, 2022–2025-ci illər ərzində dünyada bu peyvəndlərin illik istehsalı iki dəfədən çox artaraq təxminən 30 milyon dozadan 80 milyon dozaya yüksəlib. ÜST bu artımın peyvəndlərin əlçatanlığını əhəmiyyətli dərəcədə yaxşılaşdırdığını bildirib.

Bakterial meningit də Seneqaldan Efiopiyaya qədər uzanan və mütəmadi epidemiyaların baş verdiyi ölkələr üçün ciddi problem olaraq qalır. 2025-ci ildə regionun 26 ölkəsindən 24-ü ÜST-yə bakterial meningit üzrə 21 526 ehtimal edilən yoluxma və 971 ölüm halı barədə məlumat verib. Bu göstərici 4,5 faizlik ölüm nisbətinə uyğundur.