Alannahın möcüzəsi - Altı orqanla yenidən doğuluş

21 Fevral 2025

722

2008-ci ildə, cəmi beş yaşında olan amerikalı Alannah güclü qızdırma keçirdi, sürətlə arıqladı və eyni zamanda qarın nahiyəsində şişkinlik əmələ gəldi.

Azmedinfo.az körpənin həyat hekayəsini təqdim edir:

Həkimlər onda nadir rast gəlinən sarkoma növü aşkar etdilər. Şiş sürətlə müxtəlif orqanlara yayılırdı. Onu çıxarmaq üçün iki dəfə cərrahi əməliyyat aparılsa da, bu mümkün olmadı. Kimyaterapiya da gözlənilən nəticəni vermədi.

Şiş Alannahın qarın boşluğunda böyüyərək ona ciddi ağrılar verirdi, yemək yeməsini çətinləşdirir və bədənində maye yığılmasına səbəb olurdu. Yeganə çıxış yolu orqan nəqli idi. Bu, onun həyatını xilas etmək üçün son şans idi. Alannah əməliyyat üçün il yarımdan çox gözləmə siyahısında qaldı.

Bu, adi transplantasiya deyildi. Qıza birdəfəyə altı orqan—mədə, qaraciyər, dalaq, nazik bağırsaq, mədəaltı vəzi və qismən qida borusu köçürülməli idi. Həkimlər ailəyə xəbərdarlıq etmişdilər ki, əməliyyatın uğurla başa çatma ehtimalı cəmi 50 faizdir. Amma başqa seçim yox idi, əks halda, Alannah yaşaya bilməzdi.

Nəhayət, uyğun donor tapıldı və həkimlər əməliyyata başladılar. Əməliyyatın ən çətin hissəsi şişlə birlikdə bütün zədələnmiş orqanları çıxarmaq idi. Bu, tibbdə indiyə qədər həyata keçirilmiş ən genişmiqyaslı şiş çıxarma əməliyyatlarından biri hesab olunurdu. Həkimlər əməliyyatı uğurla icra etdilər. Bütün zədələnmiş orqanlar çıxarıldı və onların yerinə eyni yaş və çəkidə olan donorun sağlam orqanları köçürüldü.

Əməliyyatdan sonra Alannah üç ay xəstəxanada qaldı. Bu müddətdə o, müxtəlif infeksiyalar və ağırlaşmalarla mübarizə apardı. Lakin güclü iradəsi və həkimlərin fədakarlığı sayəsində o, sağalmağa başladı. Nəhayət, həkimlər onun evə buraxılmasına icazə verdilər.

Əməliyyatdan sonra aktiv həyata qayıdan Alannah sevincini jurnalistlərlə də bölüşdü. O dedi ki, yenidən xizək sürə, qardan adam düzəldə, sevimli albomları üzərində işləyə və nənəsi ilə zarafat edə bilir.

Alannahın hekayəsi orqan bağışlamanın nə qədər həyati əhəmiyyətli olduğunu bir daha vurğulayır. Donorluq insan həyatını xilas edən ən əvəzsiz və qiymətli hədiyyədir.

Orqan Donorluğu və Transplantasiyası üzrə Koordinasiya Mərkəzi