Sağlam gələcək naminə - Uşaqların icbari dispanserizasiyası davam edir

21 Fevral 2025

562

Bərdə, Beyləqan, Xocalı və Qazax rayon mərkəzi xəstəxanalarının tibb heyəti tərəfindən “Uşaqların icbari dispanserizasiyadan keçirilməsinə dair Dövlət Proqramı”na uyğun olaraq uşaqların ilkin müayinələri həyata keçirilir.

Azmedinfo.az TƏBİB-ə istinadən xəbər verir ki, Bərdə şəhər N.Nərimanov adına 3 saylı tam orta məktəbdə, Beyləqan rayon Təzəkənd tam orta məktəbində, Xocalı rayon 4 nömrəli tam orta məktəbində və Qazax rayonunun Dəmirçilər kənd tibb məntəqəsində baş tutan müayinələrdə həkim-pediatr, həkim-nevroloq, həkim-oftalmoloq, həkim-otorinolarinqoloq və s. ixtisaslı mütəxəssislər iştirak edib.

Məhz bu rayonlarda keçirilən tədbirlər çərçivəsində ümumilikdə 600-dən çox uşaq ilkin müayinələrə cəlb olunub, xəstəlik aşkarlanan uşaqlarla bağlı məlumatlar həm məktəb rəhbərliyinə, həm də valideynlərə təqdim edilib. Həmin şagirdlərin qısa zamanda ilkin səhiyyə xidməti göstərən tibb müəssisələrinə müraciət edərək geniştərkibli müayinələrdən keçməsi və aşkarlanan xəstəliklərin müalicəsinə başlaması tövsiyə olunub.

Qeyd edək ki, uşaqların icbari dispanserizasiyası Azərbaycan Respublikasının Prezidentinin 5 mart 2013-cü il Fərmanına uyğun olaraq davam etdirilir.

İcbari dispanserizasiyasının əsas məqsədi uşaqlar, o cümlədən məktəblilər arasında xəstələnmə, sağlamlıq imkanlarının məhdudluğunun və ölüm səviyyəsinin azaldılmasıdır.

İcbari dispanserizasiya zamanı uşaqlara illik profilaktik baxış həyata keçirilir. İcbari dispanserizasiya çərçivəsində uşaqlar hər il bir və ya bir neçə ixtisas üzrə mütəxəssislər (pediatr, stomatoloq, nevroloq, cərrah, endokrinoloq, uroloq, oftalmoloq, otorinolarinqoloq, dermatoloq və digər mütəxəssislər) tərəfindən diaqnostik və laborator müayinələrə cəlb edilir. Proses il ərzində mütəmadi şəkildə aparılır.