Rusiya alimləri dərman vasitələrinin inkişafına kömək edəcək süni intellekt yaradıblar.

Azmedinfo.az TASS-a istinadən xəbər verir ki, bu barədə İnnopolis Universitetinin mətbuat xidməti məlumat yayıb. Sistem tibbi dərmanlar, baytarlıq məhsulları və aqrokimyəvi maddələrin yaradılması üçün molekullar yarada və təkmilləşdirməyə qadirdir.

Mətbuat xidməti bildirib ki, yeni texnologiya dərmanların aşkarlanması prosesini əhəmiyyətli dərəcədə sürətləndirməyə imkan verir. "Bu, adətən iki-dörd həftə çəkir, lakin indi yeni molekullar cəmi 72 saat ərzində əldə edilə bilər", - deyə ekspertlər izah ediblər.

İnnopolis Universitetinin Süni İntellekt İnstitutunun direktoru Ramil Kuleyev bildirib ki, platforma artıq əczaçılıq şirkətləri və universitetlər üçün əlçatandır: "Biz yeni dərmanlar hazırlayanlarla işləməyə və araşdırmalara kömək etməyə hazırıq".

Bildirilib ki, sistem xarici analoqlardan molekulyar birləşmələrin axtarışında yüksək dəqiqliyi ilə fərqlənir. O, yeni birləşmələrin xassələrini proqnozlaşdıra və ən perspektivli variantları seçə bilər.