Kimyaterapiya alan xərçəng xəstələrində saç tökülməsini tamamilə dayandıra biləcək inqilabi bir müalicə üsulu hazırlanıb. Şeffild Hallam Universitetinin alimləri tərəfindən aparılan bu araşdırma, saç köklərini kimyaterapiyanın zərərli təsirlərindən qorumaq üçün "ikiqat müdafiə təmin edən güclü bir metod" təklif edir.

Azmedinfo.az "TRT Haber"ə istinadən yazır ki, yeni üsul sayəsində saç kökləri üzərində kimyaterapiya toksikliyinə qarşı daha təsirli bir qoruma təmin edir.

Araşdırma nəticəsində, baş dərisinin 18°C-yə qədər soyudulmasının saç köklərindəki zədələri tamamilə blokladığı müəyyən edilib. Lakin 26°C-yə qədər soyutmanın kifayət qədər qoruma təmin etmədiyi vurğulanıb. Soyutma prosesi, baş dərisinə gedən qan axınını azaldaraq, kimyaterapiya dərmanlarının saç köklərinə çatmasını məhdudlaşdırır.

Şeffild Hallam Universitetindən Hüceyrə Biologiyası Dosenti Dr. Nik Georgopoulos laboratoriya şəraitində aparılan tədqiqatlar zamanı saç dərisindən alınan follikulları çoxaltdıqlarını və kimyaterapiyanın təsirlərini araşdırdıqlarını bildirib: "Soyutma, saç istehsalından məsul olan sürətlə bölünən hüceyrələri sadəcə qorumur, həm də onların tamamilə sağ qalmasını təmin edir. Lakin bunun üçün ideal temperaturdan istifadə etmək vacibdir."

Tədqiqatda həmçinin, soyutma prosesinə əlavə olaraq tətbiq edilən topikal antioksidant losyonun, soyutmanın qoruyucu təsirini əhəmiyyətli dərəcədə artırdığı aşkar edilib. Losyonun tərkibində qırmızı üzüm və yerfıstığında olan resveratrol ilə yanaşı, qida əlavəsi olan N-Asetilsistein yer alır.

Dr. Georgopoulos bəzi xəstələrdə soyutma metodunun yetərsiz qala biləcəyini qeyd edərək deyib: "Bəzi başlar – mən onlara "inatçı başlar" deyirəm – kifayət qədər soyumur. Bu hallarda topikal məhsulla edilən dəstək, qoruma qabiliyyətini tamamilə dəyişir."

Bununla belə, Georgopoulosun fikrincə, antioksidant losyon təkbaşına kifayət qədər güclü deyil. Soyutma metodu isə eyni zamanda bir neçə qoruyucu təsir yaradır: "Soyuqda qan damarları daralır, baş dərisinə daha az qan – deməli daha az dərman – gedir. Bundan əlavə, hüceyrələrin bölünməsi yavaşlayır. Bu da həm fiziki, həm də biokimyəvi səviyyədə qoruma təmin edir."