"The New England Journal of Medicine" jurnalında dərc olunan beynəlxalq ESSENCE araşdırmasına əsasən, hazırda şəkərli diabet və piylənmə müalicəsində istifadə edilən "Semaglutid" preparatı metabolik assosiasiyalı steatohepatit (MASH) kimi tanınan ağır qaraciyər zədələnməsini dayandıran ilk dərman oldu.

Azmedinfo.az jurnala istinadən yazır ki, bu xəstəlik üçün bu günə qədər təsdiqlənmiş heç bir müalicə üsulu mövcud deyildi.

72 həftə davam edən tədqiqatda 37 ölkədən 800 pasiyent iştirak edib. Yüksək dozada semaglutid inyeksiyası alan xəstələrin böyük əksəriyyətində qaraciyər iltihabı əhəmiyyətli dərəcədə azalıb. Üçdə birindən çox iştirakçıda fibrozda yaxşılaşma müşahidə edilib. Eyni zamanda, xəstələrdə orta hesabla 10,5 faiz çəki itkisi qeydə alınıb, qaraciyər fermentlərinin göstəriciləri isə normallaşıb.

Tədqiqatın rəhbərləri, britaniyalı alim Filip Nyusom və amerikalı mütəxəssis Arun Sanyal bildiriblər ki, MASH sirroz və qaraciyər xərçəngi riskini artıran təhlükəli vəziyyətdir və xüsusilə piylənmə və diabetli insanlarda geniş yayılıb. İnyeksiyalar zamanı ürəkbulanma və ishal kimi yan təsirlər qeydə alınıb, lakin bunlar nəzarət altında saxlanılıb.

Hazırda alimlər "Semaglutid"in uzunmüddətli təsirlərini 1200 pasiyent üzərində öyrənməyə davam edirlər. Mütəxəssislər bu nəticələri milyonlarla insan üçün ümidverici bir irəliləyiş kimi qiymətləndirirlər.