2025-ci ildə uşaq piylənməsinin tarixdə ilk dəfə olaraq çəki azlığı hallarını üstələməsi Ümumdünya Səhiyyə Təşkilatını (ÜST) hərəkətə keçirib. Qurum tərəfindən yayımlanan yeni qlobal təlimatda məktəblərdə qida mühitinin köklü şəkildə dəyişdirilməsi və uşaqların sağlamlığının qorunması üçün dövlətlərə mühüm çağırışlar edilib.

Azmedinfo.az xəbər verir ki, ÜST-ün hesabatda hazırda hər on məktəblidən birinin piylənmədən əziyyət çəkdiyini, 391 milyon uşağın isə artıq çəkili qrupuna daxil olduğunu qeyd edib. Bu böhranla mübarizə aparmaq üçün ÜST məktəblərdə şəkərli, duzlu və yağlı qidaların satışına sərt qanuni məhdudiyyətlərin qoyulmasını, eyni zamanda meyvə, tərəvəz və tam taxıllı məhsulların icbari artırılmasını tövsiyə edir.

Təşkilat həmçinin "nəzakətli təşviq" adlanan metod vasitəsilə sağlam qidaların uşaqlar üçün vizual olaraq daha cəlbedici hala gətirilməsini və reklam təzyiqlərinin azaldılmasını təklif edir. "Bütöv məktəb yanaşması" çərçivəsində tətbiq olunacaq bu islahatlarla 2030-cu ilə qədər dünyada 466 milyon uşağın hər gün tam keyfiyyətli və qidalı yeməklə təmin olunması hədəflənir.