Mart ayında İsrailin həyata keçirdiyi zərbələr nəticəsində Livanda vəzifəsini yerinə yetirərkən həlak olan səhiyyə işçilərinin sayı 51-ə çatıb.

Azmedinfo.az xəbər verir ki, bu barədə Ümumdünya Səhiyyə Təşkilatının (ÜST) baş direktoru Tedros Adhanom Qebreyesus məlumat verib.

Onun sözlərinə görə, bölgədə səhiyyə infrastrukturuna qarşı hücumlar davam edir və bu, humanitar vəziyyəti daha da ağırlaşdırır:"Bu gün Livanın cənubunda daha bir faciə baş verib. Səhiyyə müəssisələrinə edilən beş hücumda doqquz səhiyyə işçisi həlak olub və bu ay həlak olan səhiyyə işçilərinin sayı 51-ə çatıb", – deyə o bildirib.

Qeyd edilib ki, səhiyyə obyektlərinə və tibbi personalın fəaliyyətinə qarşı yönəlmiş hücumlar beynəlxalq humanitar hüququn ciddi şəkildə pozulması hesab olunur. ÜST rəhbəri tərəfləri mülki əhalinin, xüsusilə də tibb işçilərinin təhlükəsizliyini təmin etməyə çağırıb və səhiyyə sisteminin qorunmasının vacibliyini vurğulayıb.

Mütəxəssislər bildirirlər ki, davam edən hücumlar regionda tibbi xidmətlərin əlçatanlığını ciddi şəkildə məhdudlaşdırır və minlərlə insanın həyatını risk altında qoyur.