Həkim uşaqlarda gecikdirilmiş qarın ağrılarının risklərini açıqladı

08 May 2026

550

Həkim uşaqlarda gecikdirilmiş qarın ağrılarının risklərini açıqladı

ATU-nun Tədris Cərrahiyyə Klinikasının uşaq cərrahiyyəsi şöbəsinin müdiri Hikmət Alşanov uşaqlarda kəskin cərrahi patologiyalar və onların vaxtında aşkarlanmasının əhəmiyyəti barədə danışıb.

Azmedinfo.az xəbər verir ki, həkimin sözlərinə görə, klinikada anadangəlmə inkişaf qüsurları ilə yanaşı, təcili cərrahi yardım tələb edən kəskin qarın sindromu ilə müraciət edən uşaqlara da tez-tez rast gəlinir. Bu vəziyyət ciddi diqqət tələb edən patoloji hal hesab olunur. O bildirib ki, qarın ağrısı olan uşaqlar pediatr və infeksionistlər tərəfindən mütləq qiymətləndirilməli və zəruri hallarda uşaq cərrahına yönləndirilməlidir. Gecikmiş diaqnozlar cərrahi müdaxilənin çətinləşməsinə və ağırlaşma risklərinin artmasına səbəb ola bilər.

Hikmət Alşanov qeyd edib ki, xüsusilə kəskin respirator virus infeksiyalarından sonra qan vasitəsilə yayılan infeksiya fonunda kəskin appendisit halları daha çox müşahidə olunur. Bu tip hallara hətta iki aylıq körpələrdə belə rast gəlinə bilər.

Mütəxəssis vurğulayıb ki, ultrasəs müayinəsi ilə yanaşı, uşaqların vaxtında uşaq cərrahına göstərilməsi vacibdir. Əks halda gecikmiş hallarda yayılmış peritonit, əməliyyatın uzanması, bitişmə və bağırsaq keçməzliyi kimi ağırlaşmalar yarana bilər.

Onun sözlərinə görə, Tədris Cərrahiyyə Klinikasında kəskin appendisit hallarında əsasən laparoskopik üsula üstünlük verilir. Bu yanaşma daha az travmatikdir və ağırlaşma riskini minimuma endirir.

Bildirilib ki, əməliyyatlar ümumi anesteziya altında icra olunur və gecikmiş hallarda belə laparoskopik müdaxilə tətbiq edilir ki, sonrakı ağırlaşmaların qarşısı alınsın.