Avstraliyanın Melburn Kral Texnologiya Universitetindən olan tədqiqatçılar quraşdırılmış sensorlar ilə geyilə bilən yara monitorinqi qurğusu hazırlayıblar. Bu sensorlar fiziki təmas ehtiyacını minimuma endirməklə infeksiya riskini azalda bilər.

Azmedinfo.az xəbər verir ki, standart üsullar yaranın vəziyyətini qiymətləndirmək üçün sarğıların müntəzəm çıxarılmasını tələb edir. Bu, çox vaxt mühüm müdaxilələrin gecikməsinə zəmin yaradır. Halbuki, bu yeni ixtira "bluetooth" bağlantısı vasitəsilə müalicəni uzaqdan idarə etməyə imkan verir.

Prototip cihazın təkrar istifadə üçün yararlı olması onu birdəfəlik ağıllı sarğılar və digər yeni yara monitorinqi texnologiyalarından daha sərfəli və praktik edir.

Dünyada milyonlarla insan xroniki yaralardan əziyyət çəkir ki, bu da onların həyat keyfiyyətinə təsir göstərir və ciddi sağlamlıq xərcləri ilə nəticələnir.

Yeni ağıllı monitor əsas sağalma göstəricilərinə davamlı olaraq nəzarət etmək üçün iltihab, pH və temperatur sensorları da daxil olmaqla qabaqcıl inteqrasiya edilmiş sensor texnologiyasından istifadə edir.

Yüksək temperaturlar iltihab və ya infeksiyaya işarə edir və pH səviyyələrindəki dəyişikliklər yaraların sağalmasının hansı mərhələdə olduğunu göstərə bilir.

Onun komponentləri biouyğunluğu, asanlıqla mövcud istehsal proseslərinə tətbiq oluna bilməsi sayəsində potensial olaraq irimiqyaslı istehsal üçün maya dəyərini 5 dollardan aşağı salır.

Xatırladaq ki, Melburn Kral Texnologiya Universitetinin funksional materialların və mikrosistemlərin araşdırılması qrupu yuxunun keyfiyyətini və rahatlığını izləmək üçün yaşlı insanlara qulluq edən yataq sensorları, geyilə bilən ürək monitoru kimi çoxsaylı tibbi cihazın işlənib hazırlanmasında böyük təcrübəyə malikdir.