Süni intellekt əsasında hazırlanan mobil cihaz gözün torlu qişasının təsvirlərini bir saniyədən az müddətdə mükəmməl dəqiqliklə yoxlayır və gözlərdə diabetin olub-olmamasını aşkarlayır.

Azmedinfo.az-ın verdiyi xəbərə görə, adıçəkilən cihaz Beynəlxalq Endokrinoloqlar Cəmiyyətinin bu günlərdə San Fransiskoda keçirilən "ENDO-2025" beynəlxalq konqresində təqdim edilib.

Mütəxəssislərin ilkin rəyinə görə, bütün dünyada sürətli və ucuz qiymətə əlçatan olacaq bu "ağıllı" texnologiya diabetik retinopatiya və digər göz xəstəliklərinin görmə qabiliyyətini qoruyan skrininq üçün böyük ümidlər vəd edir.

O, sadə smartfonlar da daxil olmaqla, internetə qoşulan bütün cihazlarda retinal təsvirləri sürətli və dəqiq təhlil etmək üçün qabaqcıl dərin öyrənmə alqoritmlərindən istifadə edir.

Qarşısı alına bilən korluğun əsas səbəbi olan diabetik retinopatiya bütün dünyada 100 milyondan çox insana təsir göstərir. Çünki, dünya əhalisinin şəkərli diabetə düçar olması günbəgün daha sürətli və daha geniş miqyasda müşahidə olunur.

Hyustondan olan iki tədqiqatçı dünyanın 6 qitəsində əhalinin müxtəlif təbəqələrini təmsil edən anonim şəxslərə məxsus gözün torlu qişasının bir neçə min təsvirini əldə ediblər. Bu şəkillər bir saniyədən az müddətdə 99%-dən çox dəqiqliklə diabetik retinopatiyanı aşkarlamaq və onun hansı mərhələdə olduğunu müəyyənləşdirmək məqsədilə dərin öyrənmə modellərini hazırlamaq və təsdiqləmək üçün istifadə edilmişdir. Adıçəkilən dərin öyrənmə modeli, həmçinin diabetik retinopatiyanı oxşar göz patologiyalarından fərqləndirməyi bacarıb.

Müxtəlif beynəlxalq tibbi və səhiyyə təşkilatlarını təmsil edən mütəxəssislər süni intellekt əsaslı bu mobil tətbiqin etibarlılığını və istifadəsinin asanlığını təsdiqləyiblər. Eyni zamanda, onun qlobal səviyyədə istifadəsinin uğurlu nəticələrə yol açacağını vurğulayıblar.

Tibb elminin bu yeni nailiyyəti sübut edir ki, süni intellekt xeyirxahlıq məqsədlərinə xidmət edərək görmə qabiliyyətini itirmək riski daşıyan milyonlarla insana yeni ümidlər verir.