Qurani-Kərim bəşəriyyətə sadəcə formal qaydalar toplusu və ya müəyyən mərasimlərdə oxunacaq müqəddəs bir mətn olaraq deyil, insanın şüurunu dəyişdirən, ona varlığın mahiyyətini qandıran həyati bir bələdçi kimi nazil olmuşdur. Bu səbəbdən Qurani maariflənmə dedikdə, yalnız ayələrin səsli mütaliəsi və ya əzbərlənməsi deyil, ilahi kəlamın dərinliyinə varmaq, onun məntiqini və ruhunu qavramaq nəzərdə tutulur. Doğru maariflənmə olmadıqda, ilahi mesajın yerini insan subyektivliyi, əsrlər boyu formalaşmış xurafatlar və şüursuz təqlidçilik tutur.

Azmedinfo.az ruh və təfəkkür sağlamlığı, "Qurani maariflənmə" silsiləsindən növbəti yazını təqdim edir.

İlahı kəlamı doğru anlamaq, hər şeydən öncə insanı zehni köləlikdən və cəhalətdən azad edir. Quranın özü insanı davamlı olaraq təfəkkür etməyə, Kainatın nizamını müşahidə etməyə və kor-koranə inanmaqdan uzaq durmağa çağırır. Doğru maariflənmə prosesində insan ayələrin nazil olma kontekstini, onların ümumi əxlaqi prinsip və məqsədlərini dərk edir. Bu isə fərdi təkzibedilməz bir mənəvi mövqeyə gətirib çıxarır; insan nəyə və nə üçün inandığını dərindən bilir, dini bilikləri kor-koranə deyil, idrak süzgəcindən keçirərək mənimsəyir.

Qurani doğru anlamağın ən mühüm əhəmiyyətlərindən biri də onun cəmiyyət və fərd səviyyəsində radikallaşmanın və təhriflərin qarşısını almasıdır. Tarix və müasir təcrübə göstərir ki, ayələrin kontekstdən qoparılaraq səthi və ya radikal şəkildə yozulması dinin mahiyyətinə böyük zərbə vurur. Doğru maariflənmə isə dinin əsasını təşkil edən ədalət, merhəmət, xoşniyyətlilik və insan ləyaqətinə hörmət kimi fundamental dəyərləri ön plana çıxarır. İnsanın ilahi kəlamı düzgün qavraması onun əxlaqında, gündəlik rəftarında və məsuliyyət hissində birbaşa özünü göstərir.

Nəticə etibarilə, Qurani maariflənmə insanın öz daxili aləmini yenidən kəşf etməsi və hayatına ilahi işığın pəncərəsindən baxa bilməsidir. Bu maariflənmə təkcə ruhi sakitlik gətirmir, həm də insana həyata və hadisələrə sağlam, ayıq və hikmətli bir nəzərlə baxmaq bacarığı qazandırır. İlahı mesajın ruhunu tutmaq, fərdi kamil insan səviyyəsinə qaldıran və cəmiyyətə sağlam mənəvi dayaqlar bəxş edən ən etibarlı yoldur.