Azərbaycan Cərrahiyyə, Qastroenterologiya və Onkologiya Cəmiyyətinin (ACQOC) və İstanbul Memorial Hospitalının həmtəşkilatçılığı ilə “Onkoloji xəstəliklərin cərrahiyyəyə təsiri” mövzusunda vebinar keçirilib.

Azmedinfo.az xəbər verir ki, vebinarı giriş sözü ilə açan ACQOC-nin sədr müavini, tədbirin spikeri Elgün Səmədov vebinarın onkoloji xəstəliklərin cərrahi müalicəsində əldə edilmiş elmi yeniliklərə, gələcək perspektivlərinin müzakirəsinə həsr olunduğunu diqqətə çatdırıb. “Son illərdə aparılan onkoloji müalicələr cərrahiyyə ilə mühüm uğurlar qazanıb” – deyə, sədr müavini bildirib.

Elgün Səmədov onkoloji xəstəliklərin müalicəsində cərrahiyyə və kimyaterapiyanın müştərək təsirinin əhəmiyyətindən ətraflı bəhs edib.

Vebinarda çıxış edən ACQOC-nin sədri, həkim onkoloq Altay Əliyev xərçəng xəstəliyinin müalicəsində azərbaycanlı və dünya alimlərinin əldə etdikləri nailiyyətlərdən söz açıb. Bu xəstəliyin müalicəsində cərrahi əməliyyatların əhəmiyyətindən danışıb.

Daha sonra vebinarın moderatoru, İstanbul Şişli Memorial Hospitalının ümumi cərrahı Mərt Tanal “Cərrahi onkologiyanın prinsipi” mövzusunda məruzə edib.

Məruzəçi onkoloji xəstəliklərin müalicəsində xəstələri sinifləndirmə və müalicə taktikasının seçilməsi strategiyasının təsnifat tarixindən bəhs edən M.Tanal qlobal texnoloji inqilab fonunda xərçəng xəstələrinin müalicəsində əldə edilmiş innovative nailiyyətlərdən söz açıb. “Texnologiyanın çox sürətlə irəliləməsi fonunda həm medikal, həm molekulyar, həm də cərrahi onkologiyada iki il öncə əldə etdiyim yeni biliklərin və informasiyanın bu gün yetərsiz olduğunu müşahidə edirəm” – deyə məruzəçi diqqətə çatdırıb.

Onun sözlərinə görə, bu gün süni intellektə, robototexnikaya söykənən əməliyyatların icra olunması öz növbəsində, xərçəng xəstəliyinin cərrahi müalicəsinin daha geniş vüsət almasına təkan verir.

Mərt Tanal cərrahi onkologiyanın radikal rezeksiya, yetərli rezeksiya, şiş manipulyasiyasının minimuma endirilməsi, cərrahi sahəyə nəzarət, əməliyyat öncəsi qiymətləndirmə və s. kimi mühüm prinsiplərinin müalicə prosesində mühüm rol oynadığını diqqətə çatdırıb.

Daha sonra cərrahi onkologiyanın gələcək perspektivlərindən, habelə xərçəng xəstəliyinin süni intellekt və robotik cərrahiyyə ilə müalicəsində gözlənilən innovativ nailiyyətlərdən bəhs edib.