Mart Beynəlxalq Kolorektal Xərçəng haqqında Məlumatlandırma və Mübarizə Ayı kimi tanınır. Dünyanın bütün aparıcı ölkələrində çox tez-tez rastlanan kolorektal xərçəng onkoloji patologiyaların strukturunda dördüncü yeri tutur.

Azmedinfo.az-ın verdiyi xəbərə görə, Azərbaycan Cərrahiyyə, Qastroenterologiya və Onkologiya Cəmiyyətinin və Liv Bona Dea Hospitalın birgə təşkilatçılığı ilə Beynəlxalq Kolorektal Xərçəng haqqında Məlumatlandırma və Mübarizə Ayına həsr olunmuş “Metastatik kolorektal xərçəngdə irəli xətt müalicələr” mövzusunda elmi-praktik müzakirə keçirildi.  

İnteraktiv tədbirdə metastatik kolorektal xərçəngin irəli xətt müalicə üsulları, eləcə də istifadə olunan onkoloji preparatlar geniş müzakirə olundu. Çıxış edən cərrahlar və medikal onkoloqlar hazırda ölkəmizdə və dünyada istifadə olunan ən son onkoloji qrup preparatlar, onların təsir mexanizmləri, yan təsirləri, xəstələrə faydalarından bəhs etdilər. Məruzəçilərin öz təcrübələrində qarşılaşdıqları situasiyalara söykənərək gəldikləri qənaət, praktik təcrübələri geniş müzakirəyə cəlb olundu.

Konfransda, həmçinin metastatik kolorektal xərçəngdən əziyyət çəkən xəstələrə doğru yanaşma şəkli, onlara nə zaman medikal onkoloji, nə zaman cərrahi, nə zaman kimyaterapiya müalicə metodlarından istifadə olunmasının daha effektli nəticə verdiyindən ətraflı bəhs edildi, qarşılıqlı maraq doğuran məsələlər müzakirə olundu, fikir mübadiləsi aparıldı.