Səhiyyə Nazirliyinin Elmi-Tədqiqat Kardiologiya İnstitutunda Ekspert Şurasının növbəti iclası keçirilib. İclasda kardiologiya sahəsində elmi fəaliyyət göstərən gənc tədqiqatçıların dissertasiya mövzuları ətrafında geniş müzakirələr aparılıb. Məqsəd tibb üzrə fəlsəfə doktoru elmi dərəcəsi almaq istəyən doktorantların təqdim etdiyi elmi işlərin aktuallığını, metodoloji əsaslarını və praktik əhəmiyyətini qiymətləndirmək olub.

Azmedinfo.az xəbər verir ki, təqdimatlar zamanı doktorant Nəsibova Aytən "Miokardial Blush Skoru və MRT vasitəsilə miokardial canlılıq göstəricilərinin korelyasiyası və nəticələrin klinik proqnozlaşdırılması" mövzusunda araşdırmasını təqdim edib. Tədqiqat işi miokardın perfuziyasını qiymətləndirməyə yönəlmiş qabaqcıl üsulların bir-biri ilə müqayisəli təhlilinə və əldə olunan göstəricilərin xəstə proqnozuna təsirinin müəyyənləşdirilməsinə həsr olunub.

Digər tədqiqatçı, Qardaşova Elnurə Qasım isə "Kompleks bifurkasion darlıqlarda dərman örtüklü balon istifadəsi ilə icra edilən perkutan koronar müdaxilələrin nəticələri" mövzusunda apardığı elmi işin nəticələrini bölüşüb. O, təqdimatında invaziv kardiologiyada yeni texnologiyaların tətbiqi və bu üsulların xəstə həyatı üçün yaratdığı üstünlüklər barədə dərin elmi təhlillər təqdim edib.

Ekspert Şurasının üzvləri hər iki dissertasiya işini maraqla dinləyərək elmi yanaşmanı yüksək qiymətləndiriblər, metodoloji yanaşmalar və praktiki tətbiq baxımından dəyərli tövsiyələr verdiblər.

Belə tədbirlər, ölkəmizdə tibb elminin inkişafı və yeni nəsil alimlərin formalaşmasında əvəzsiz rol oynayır. Elmi axtarışlara söykənən bu təşəbbüslər, sabahın sağlam cəmiyyətini qurmaq yolunda atılan möhkəm addımlardır.