Bakı Baş Səhiyyə Mərkəzinin məlumatına görə, həkim nəzarəti olmadan istifadə olunan ağrıkəsicilər bir çox hallarda xəstəliyin əsas səbəbini gizlədərək səhv diaqnozların qoyulmasına gətirib çıxara bilər. Bu baxımdan, istənilən ağrıkəsici preparata başlamazdan əvvəl mütləq həkimə müraciət edilməli, dərman yalnız müvafiq resept və əczacının tövsiyəsi ilə qəbul olunmalıdır.

Azmedinfo.az xəbər verir ki, həkim tərəfindən təyin olunan ağrıkəsicinin növü və dozası pasiyentin ümumi vəziyyəti, mövcud xəstəlikləri və eyni zamanda istifadə etdiyi digər dərmanlarla əlaqəli olaraq dəyişə bilər.

Ağrıkəsici preparatların həkim nəzarəti olmadan istifadəsi aşağıdakı təhlükəli nəticələrə səbəb ola bilər:

Həzm sistemi pozğunluqları (ən çox görülən yan təsirlər);

Mədə-bağırsaq qanamaları;

Mədə xorasının inkişafı;

Mədə və ya bağırsaq deşilməsi kimi ciddi problemlər.

Mütəxəssislər qeyd edirlər ki, bu cür fəsadların qarşısını almaq üçün həkimlə məsləhətləşmədən heç bir dərmanın qəbul olunmaması vacibdir.