ABŞ Qida və Dərman Administrasiyası (FDA) tiroid mənşəli göz patologiyalarının müalicəsində mühüm bir addım ataraq, veligrotug preparatını rəsmi olaraq təsdiqləyib. Bu dərman xəstəliyin həm aktiv (iltihabi), həm də xroniki formalarının müalicəsi üçün təsdiqlənən ilk və yeganə preparat kimi tibb tarixinə düşüb.

III faza THRIVE və THRIVE-2 klinik tədqiqatlarında veligrotug plasebo ilə müqayisədə göz almasının önə çıxmasını (proptoz) əhəmiyyətli dərəcədə azaldıb. Eyni zamanda, xəstələrdə iki görmənin (diplopiya) ciddi şəkildə yaxşılaşması və bəzi hallarda tamamilə aradan qalxması qeydə alınıb. Preparat IGF-1R (insulinəbənzər böyümə faktoru-1 reseptoru) hədəf alan monoklonal anticisimdir və təsir mexanizminə görə hazırda istifadə olunan teprotumumab ilə eynidir. Müalicə cəmi 12 həftə ərzində, hər 3 həftədən bir vurulmaqla ümumilikdə 5 venadaxili infuziya şəklində həyata keçirilir.

Azmedinfo.az xəbər verir ki, həkim-endokrinoloq Fərhad Burzunun bildirdiyinə görə, bu təsdiq tiroid mənşəli göz xəstəliklərinin idarə olunmasında tamamilə yeni bir klinik dövrün başlanğıcıdır: "İndiyə qədər tətbiq edilən terapiyalar əsasən yalnız aktiv iltihab mərhələsində effektiv olur, xəstəliyi xroniki formaya keçmiş pasiyentlər üçün isə real seçim qalmırdı. Veligrotug preparatının hər iki mərhələdə yüksək effektivlik göstərməsi xəstələr üçün yeni müalicə imkanı yaradır. Preparatın cəmi 12 həftəlik müalicə kursu və 5 infuziyadan ibarət qısa sxemi pasiyent rahatlığını kəskin şəkildə artırır. Müddət ərzində proptozun azalması və diplopiyanın aradan qalxması pasiyentlərin reabilitasiyasını sürətləndirir.

Həkim qeyd edib ki, bununla belə, preparat üçün mütləq bir əks göstəriş olmasa da, müəyyən xəbərdarlıqlara qarşı ciddi tibbi nəzarət vacibdir. Müəlliflər və klinisistlər xüsusilə infuziya reaksiyaları, hiperqlikemiya, eşitmə pozğunluğu və iltihabi bağırsaq xəstəlikləri riskini diqqətdə saxlamalıdırlar. Müalicə zamanı ən çox görülən əlavə təsirlər əzələ spazmları, baş ağrısı, yorğunluq, ishal, ürəkbulanma və yüksək qan təzyiqidir. Düzgün xəstə seçimi və vaxtında nəzarət sayəsində bu fəsadların qarşısını almaq və maksimal effektiv müalicə nəticəsi əldə etmək mümkündür.