Piylənmənin müalicəsində ən effektiv yollar kimi GLP-1 (qlükaqona bənzər peptid-1) aqonistləri və bariatrik cərrahiyyə ön plana çıxır, lakin çox zaman xəstələr və mütəxəssislər seçim etməkdə çətinlik çəkirlər.

Azmedinfo.az xəbər verir ki, tanınmış endokrinoloq Fərhad Burzunun sözlərinə görə, əməliyyatdan əvvəl GLP-1 istifadə edən və etməyən pasiyentlər arasında aparılan yeni bir tədqiqat, cərrahiyyədən sonra çəki itkisi baxımından ciddi bir fərqin olmadığını ortaya qoyub.

Həkim qeyd edir ki, 383 xəstə (92-si GLP-1 istifadəçisi, 291-i isə istifadə etməyən) üzərində aparılan araşdırmada 12 ayın sonunda hər iki qrupda çəki itkisi göstəriciləri çox yaxın olub – GLP-1 qəbul edənlər bədən çəkisinin təxminən 24%-ni, qəbul etməyənlər isə 25%-ni itiriblər. Həmçinin, bu xəstələrdə cərrahi ağırlaşmaların dərəcəsi və diabetə nəzarət göstəriciləri arasında da əhəmiyyətli dərəcədə fərq qeydə alınmayıb.

Bütün bunlarla yanaşı, əvvəlki tədqiqatların fərqli nəticələr verdiyini xatırladan Fərhad Burzu, əməliyyatdan öncə GLP-1 istifadəsinin uzunmüddətli təsirlərini öyrənmək üçün daha irimiqyaslı və dərin araşdırmalara ehtiyac olduğunu vurğulayır.

Endokrinoloq bildirir ki, istər dərman müalicəsi, istərsə də cərrahi müdaxilə universal bir həll deyil, hər bir xəstənin fərdi sağlamlıq göstəricilərinə və ehtiyaclarına əsaslanaraq təyin edilməlidir.