Bir an təsəvvür et ki, dərmanlar sanki öz qaydaları olan qonaqlardır və onları hər qida ilə qarışdırmaq olmaz, əks halda nəticə gözlədiyindən fərqli ola bilər.

Azmedinfo.az AzerMDS-in məlumatına istinadən yazır ki, dərmanlarla qidalar arsındakı mürəkkəb münasibətlər var.

Məsələn, antibiotiklər süd ilə dostluq etmir, çünki süd onların yolunu kəsərək dərmanın hədəfinə çatmadan dayanmasına səbəb olur. Təzyiq dərmanları isə qreypfrut şirəsi ilə qarşılaşanda çaşır, nəticədə dərmanın təsiri ya həddindən artıq güclənir, ya da tamamilə pozulur.

Dərmanları çay və kofe ilə qəbul etmək isə onları tələsdirib həyəcanlandırmaq kimidir ki, bu zaman ürək daha sürətlə döyünə bilər və orqanizmdə ciddi narahatlıq yarana bilər.

Ən təhlükəli duetlərdən biri hesab olunan varfarin və ispanaq isə sanki rəqib komandalar kimidir; varfarin qanı durulaşdırmağa çalışdığı halda, ispanaq tərkibindəki K vitamini ilə bu oyunun qaydalarını tamamilə dəyişir.

Buna görə də unutmaq olmaz ki, dərmanlar heç bir dramı sevmir və onlar ən çox adi su ilə yaxşı anlaşırlar.