Metformin yalnız şəkərli diabetə qarşı deyil, eyni zamanda beyin üçün də ümidverici vasitədir.

Taypey Tibb Universitetinin alimləri metformin preparatının təkcə 2-ci tip şəkərli diabetin müalicəsində deyil, həm də demensiya və vaxtsız ölüm riskinin azaldılmasında təsirli ola biləcəyini aşkar ediblər.

Azmedinfo.az nüfuzlu "Diabetes, Obesity and Metabolism" jurnalında dərc olunan tədqiqatın nəticələrinə diqqət çəkib:

450 min nəfərdən çox artıq çəki və piylənməsi olan şəxsin məlumatları təhlil edildikdən sonra məlum olub ki, Metformin qəbul edənlərdə həm koqnitiv pozuntuların, həm də ölüm hallarının riski əhəmiyyətli dərəcədə aşağı olub. Demensiya riski bu qrupda 8–12%, ölüm riski isə 26–28% az olub.

Əldə edilən təsir bütün bədən çəkisi kateqoriyalarında (mülayimdən ağır piylənməyə qədər) müşahidə edilib. Alimlər preparatın bu təsir mexanizminin hələ tam aydın olmadığını bildirsələr də, yaşla bağlı xəstəliklərin qarşısının alınması üçün metforminin potensialından istifadə imkanlarını geniş şəkildə öyrənməyə çağırıblar.