ABŞ-ın Ueyk-Forest Universitetinin alimləri tərəfindən aparılan yeni klinik tədqiqatın nəticələrinə görə, artıq mövcud olan iki preparat — empaqliflozin (şəkərli diabetə qarşı dərman) və insulin tərkibli burun spreyi — beynin Altzeymer xəstəliyi ilə əlaqəli erkən dəyişikliklərdən qorunmasına kömək edə bilər.

Azmedinfo.az xəbər verir ki, araşdırmanın nəticələri "Alzheimer’s & Dementia" jurnalında dərc olunub.

Tədqiqatda 55–85 yaş arası 47 nəfər iştirak edib. Onların hamısında yüngül koqnitiv pozğunluqlar və ya demensiyanın ilkin əlamətləri müşahidə olunub. İştirakçılar dörd qrupa bölünüb: biri empaqliflozin, digəri insulin spreyi, üçüncüsü bu iki preparatın birgə kombinasiyasını, dördüncü isə plasebo qəbul edib.

Cəmi dörd həftə davam edən bu kiçikmiqyaslı tədqiqat göstərib ki, hər iki dərman maddələr mübadiləsinin müxtəlif mərhələlərinə təsir edir, beyin qan dövranını yaxşılaşdırır, iltihabı azaldır və idrak funksiyalarının qorunmasına kömək edir.

Məlum olub ki, empaqliflozin onurğa beyni mayesində neyrodegenerasiyanın əsas göstəricilərindən biri olan tau zülalının səviyyəsini azaldır, insulin spreyi isə yaddaşı və düşünməyə cavabdeh beyin sahələri arasındakı əlaqəni gücləndirir.

Tədqiqatın rəhbəri, professor Syuzan Kraft qeyd edib ki, maddələr mübadiləsinin tənzimlənməsi altzeymer xəstəliyinin gedişatını dəyişə bilər.

Alimlərin sözlərinə görə, preparatlar iştirakçılar tərəfindən yaxşı tolere olunub və ciddi yan təsirlər qeydə alınmayıb. Hazırda komanda daha genişmiqyaslı və uzunmüddətli klinik sınaqlara hazırlaşır. Məqsəd bu əlçatan dərmanların idrak zəifləməsinin qarşısını alan kompleks terapiyanın tərkib hissəsinə çevrilib-çevrilə bilməyəcəyini müəyyənləşdirməkdir.