2026-cı ildən Azərbaycanda icbari tibbi sığorta çərçivəsində əhaliyə təqdim olunan xidmətlər genişlənəcək. İcbari Tibbi Sığorta üzrə Dövlət Agentliyinin (İTSDA) planına əsasən, vətəndaşlar artıq təkcə müayinə və müalicə deyil, həkim resepti ilə müəyyən dərman preparatlarını da pulsuz əldə edə biləcəklər.

Azmedinfo.az xəbər verir ki, agentliyin məlumatına görə, Nazirlər Kabineti dərman təminatının tənzimlənməsi və tibbi sığorta sistemində şəffaflığın artırılması ilə bağlı yeni qərarlar qəbul edib. Qərarlara əsasən, dərman vasitələrinin icbari tibbi sığorta hesabına kompensasiya mexanizmi və Xidmətlər Zərfinə daxil edilmə meyarları müəyyənləşdirilib.

Hazırda “pozitiv siyahı”, yəni ambulator şəraitdə sığorta hesabına veriləcək dərmanların siyahısı hazırlanır. Siyahıda dərmanların ticarət və təsiredici maddə adları, dozası, farmasevtik forması, tətbiq sahəsi, kompensasiya dərəcəsi və s. göstəriləcək. Bu siyahı hər rüb yenilənəcək və Agentliyin rəsmi saytında dərc olunacaq.

Eyni zamanda elektron resept sistemi sığortanın məlumat bazası ilə inteqrasiya edilir və özəl apteklərlə əməkdaşlıq mexanizmləri qurulur. Pasiyentlər reseptlə təyin olunan dərmanları İTSDA ilə müqaviləsi olan apteklərdən əldə edə biləcəklər.

İlkin mərhələdə icbari tibbi sığorta hesabına ürək-damar xəstəliklərinin müalicəsində istifadə olunan dərman vasitələrinin qarşılanması planlaşdırılır.