Uorvik Universiteti və Monash Universitetinin kimyaçıları müasir dərmanlara, o cümlədən MRSA və VRE kimi təhlükəli patogenlərə qarşı effektiv təsir göstərən perspektivli yeni antibiotik kəşf ediblər. Bu bakteriyalar hazırda qlobal səhiyyə üçün ən ciddi infeksion təhdidlərdən sayılır.

Azmedinfo.az "Journal of the American Chemical Society" jurnalında dərc olunan tədqiqatın nəticələrinə diqqət çəkin:

Alimlərin sözlərinə görə, yeni antibiotik əslində “göz önündə gizlənmişdi”. 50 il əvvəl kəşf edilən metilenomisin A adlı antibiotikin təbii biosintez prosesi zamanı yaranan aralıq birləşmələrdən biri olub.

Uorvik Universitetinin və Monash Universitetinin Biotibbi Tədqiqatlar İnstitutunun professoru Qreq Çallis bildirib: “Metilenomisin A çoxdan məlum idi, lakin onun biosintezinin aralıq mərhələləri heç vaxt antimikrob aktivlik baxımından yoxlanılmamışdı. Biz biosintezdə iştirak edən bəzi genləri çıxararaq iki yeni aralıq birləşmə əldə etdik və hər ikisi ilkin antibiotikdən xeyli güclü çıxdı.”

Bu birləşmələrdən biri predmetilenomisin C lakton metilenomisin A-dan 100 dəfə güclü təsir göstərib. O, Staphylococcus aureus və Enterococcus faecium bakteriyalarına qarşı yüksək effektivlik nümayiş etdirib. Bu mikroorqanizmlər MRSA və VRE kimi çox dərmana davamlı infeksiyaların əsas səbəbləridir.

Tədqiqatçılar həmçinin qeyd ediblər ki, yeni maddəyə qarşı bakteriyalarda davamlılıq yaranmayıb, hətta onlar adətən “sonuncu müdafiə xətti” sayılan vankomisinə qarşı müqavimət inkişaf etdirdikdə belə.

Alimlərin fikrincə, predmetilenomisin C laktonun kəşfi antibiotik axtarışında yeni istiqamət açır. Artıq məlum biosintetik proseslərin aralıq məhsullarını öyrənməklə daha güclü və davamlı dərmanlar tapmaq mümkündür.

Növbəti mərhələdə yeni antibiotikin doklinik sınaqları keçiriləcək. Eyni zamanda Monash Universitetinin komandası bu maddənin sənaye miqyasında sintezini və analoqlarının hazırlanmasını təmin edən üsul da işləyib hazırlayıb.