“Həkimlər və Təbib Tələbələr” İctimai Birliyinin təşkilatçılığı ilə gənclər üçün süni intellekt (AI) mövzusunda maarifləndirici görüş keçirilib. Tədbir çərçivəsində əsas diqqət “MedImageX: Elmi məqalələr üçün süni intellekt əsaslı tibbi vizualların yaradılması” mövzusuna ayrılıb.

Azmedinfo.az xəbər verir ki, tədbirdə süni intellekt mütəxəssisi Olaf Yunus Laitinen İmanov tədqiqat sahəsində istifadə olunan müxtəlif AI texnologiyaları haqqında geniş təqdimatla çıxış edib. O, elmi məqalələr üçün qrafik abstraktların, qrafiklərin və vizual materialların hazırlanmasında müasir AI alətlərinin rolunu izah edərək, bu texnologiyaların elmi iş prosesini necə sürətləndirdiyini vurğulayıb.

Nəzəri hissədən sonra iştirakçılar qrup workshoplarına cəlb olunaraq praktiki sessiyada iştirak ediblər. Bu sessiya zamanı gənclər süni intellekt alətləri vasitəsilə konkret tapşırıqlar üzərində işləyib və real vaxt rejimində elmi vizuallar hazırlayıblar. Təqdimatçı proses boyunca iştirakçılara yaxından dəstək olub, lazımi izahlar verib və hazırlanan materiallara dair fərdi rəylərini bildirib.

Görüşün sonunda xatirə şəkilləri çəkilib və iştirakçılar həm nəzəri, həm də praktiki bacarıqlar qazanaraq tibbi tədqiqatlarda AI-nın tətbiq imkanları ilə yaxından tanış olublar.