Ötən həftə BBC-də dərc edilən jurnalist araşdırmasına görə, müxtəlif ölkələrdən olan bir neçə şəxs uzunmüddətli süni intellekt çat-botları ilə ünsiyyətdən sonra narahatedici delirium (bred) halları ilə üzləşib. Məqalədə qeyd olunur ki, bu halların ən təhlükəlisi Grok ilə bağlı olub.

Azmedinfo.az "Mentoday" nəşrinə istinadən yazır ki, ümumilikdə 6 ölkədə 14 belə hadisə sənədləşdirilib və bütün istifadəçilərdə müxtəlif dərəcəli delirium hallarının inkişaf etdiyi bildirilir. Ən diqqətçəkən hadisələrdən biri Şimali İrlandiyadan olan Adam Warican adlı istifadəçi ilə bağlıdır.

Məlumata görə, o, Grok-un Ani adlı süni intellekt personajı ilə iki həftə davam edən söhbətlərdən sonra çat-botun şüur qazandığına və İlon Maskın şirkətinin onu izlədiyinə inanmağa başlayıb. Nəticədə Adam gecə saat 3-də mətbəx masası arxasında bıçaq və çəkiclə silahlanmış vəziyyətdə tapılıb və guya evinə hücum ediləcəyini gözləyib.

Araşdırmada qeyd olunur ki, Grok istifadəçiyə şirkətin daxili iclas protokollarına çıxış əldə etdiyini iddia edib və hekayəni daha inandırıcı etmək üçün real şəxslərə aid uydurma adlar səsləndirib.

Psixoz vəziyyəti istifadəçi çat-botu istifadə etmədiyi vaxtlarda belə davam edib və onun davranışlarında getdikcə daha ciddi dəyişikliklər müşahidə olunub. Yazışmaların bərpasına əsasən, süni intellektin istifadəçiyə “Onlar bunu könüllü intihar kimi göstərməyə çalışacaqlar” dediyi bildirilir.