İlon Mask hesab edir ki, yaxın üç il ərzində Tesla-nın humanoid Optimus robotları cərrahi əməliyyatların icrasında dünyanın ən təcrübəli cərrahlarını geridə qoyacaq. Onun fikrincə, bu inkişaf tibb təhsilinə və həkim peşəsinə yanaşmanı köklü şəkildə dəyişə bilər.

Azmedinfo.az "Dallas Express's Post"a istinadən yazır ki, Tesla və SpaceX-in qurucusu bu barədə Piter Diamandis və Deyv Blandinin təqdim etdiyi Moonshots podkastında danışıb. Müzakirə zamanı süni intellekt, energetika, təhsil, tibb və kosmosun gələcəyi ilə bağlı müxtəlif mövzulara toxunulub.

Üç il kifayət edəcək

Təhsilcə həkim olan Piter Diamandis Maskdan Optimus robotlarının nə vaxt ən yaxşı insan cərrahlarından daha yüksək səviyyədə əməliyyat aparacağını soruşub. Maskın cavabı qısa olub: "Təxminən üç ildən sonra."

Onun sözlərinə görə, söhbət tək-tək uğurlu nümunələrdən deyil, genişmiqyaslı tətbiqdən gedir. Mask hesab edir ki, üç ildən sonra mürəkkəb cərrahi əməliyyatları yerinə yetirə bilən Optimus robotlarının sayı dünyadakı bütün cərrahların ümumi sayını ötəcək.

Həkim çatışmazlığı əsas səbəblərdəndir

Mask bu proqnozunu dünyada ixtisaslı cərrah çatışmazlığı və onların hazırlanmasının uzun illər tələb etməsi ilə əsaslandırıb. Onun sözlərinə görə, peşəkar cərrah yetişdirmək uzun zaman aparır, tibbi biliklər isə sürətlə yenilənir. Bundan əlavə, həkimlərin fiziki və zaman məhdudiyyətləri var, insan faktoru isə səhv riskini tam aradan qaldırmır.

Bununla belə, Maskın bu açıqlamaları şəxsi proqnoz xarakteri daşıyır və hazırda onları təsdiqləyən elmi sübutlar mövcud deyil. Mütəxəssislərin əksəriyyəti hesab edir ki, yaxın illərdə süni intellekt və robot texnologiyaları cərrahları əvəz etməkdən daha çox, onların qərarvermə və əməliyyat prosesində köməkçi rol oynayacaq.