“Həkimlər və Təbib Tələbələr” İctimai Birliyinin tərkibində fəaliyyət göstərən Tibb Təhsili üzrə Daimi Komitənin (SCOME) təşkilatçılığı ilə tibb tələbələri və gənc mütəxəssislər üçün “The Robotic Era: Beyond the Human Hand” mövzusunda elmi-maarifləndirici seminar keçirilib.

Azmedinfo.az xəbər verir ki, tədbirin əsas məqsədi müasir cərrahiyyənin ən son nailiyyətlərindən olan robotik texnologiyaların elmi əsaslarını və klinik praktikada tətbiq sahələrini iştirakçılara daha yaxından tanıtmaq olub.

Seminarda spiker qismində PhD Dr. Şəmistan Alıyev – Milli Onkologiya Mərkəzinin Onkoginekologiya bölməsinin rəhbəri çıxış edib. O, 15 sentyabr tarixində ölkəmizdə ilk dəfə Milli Onkologiya Mərkəzində uğurla icra olunmuş robot-assistentli total histerektomiya əməliyyatının klinik əhəmiyyətindən bəhs edib.

Bundan əlavə, 16 oktyabr tarixində Azərbaycan Milli Onkologiya Mərkəzi ilə Çinin Harbin şəhəri arasında həyata keçirilmiş ilk uzaqdan robotik cərrahiyyə əməliyyatının təcrübəsini iştirakçılarla bölüşüb. Çıxışı zamanı Da Vinci cərrahi robot sisteminin imkanları və Sagebot AI köməkçi sisteminin cərrahi qərarvermə prosesində rolu da əyani nümunələrlə izah olunub.

Seminar çərçivəsində süni intellektin cərrahi praktikaya inteqrasiyası, tibbdə texnoloji inkişafların yaratdığı yeni imkanlar və gələcək perspektivlər ətrafında geniş müzakirələr aparılıb. İştirakçılar mövzu ilə bağlı suallar ünvanlayaraq interaktiv müzakirələrdə fəal iştirak ediblər.

Tədbir iştirakçılara onkoginekologiya sahəsində müasir yanaşmalar, robotik cərrahiyyənin tətbiq imkanları və gələcəyin tibbinə innovativ baxış bucağı ilə bağlı dəyərli bilik və təcrübə qazandırıb.