Müasir tibb elmində piylənmə və şəkərli diabetlə mübarizədə inqilab edən bəzi preparatların gözlənilməz faydaları araşdırırlıb.

Azmedinfo.az xəbər verir ki, endokrinoloq həkim Fərhad Burzu yeni araşdırmaların piylənmə və diabet müalicəsində istifadə olunan GLP-1 reseptor agonistlərinin, yəni xalq arasında "arıqlama iynələri" kimi tanınan dərmanların xroniki miqren xəstələrində bəzi müsbət təsirlərlə əlaqəli ola biləcəyini göstərdiyini bildirib.

"Aparılan genişmiqyaslı tədqiqatlara görə, GLP-1 preparatlarına başlayan xroniki miqren xəstələrində təcili yardıma müraciət halları 10 faiz daha az qeydə alınıb. Eyni zamanda, bu xəstələrdə hospitalizasiya riski 14 faiz daha aşağı müşahidə edilib və triptan qrupundan olan spesifik miqren dərmanlarına ehtiyac əhəmiyyətli dərəcədə azalıb", - deyə ekspert bildirib.

Endokrinoloq alimlərin qənaətinə diqqət çəkərək, GLP-1 preparatlarının iltihabəleyhinə və neyrovaskulyar təsirləri birbaşa miqren mexanizmlərinə təsir göstərərək ağrıların intensivliyini azalda biləcəyini deyib. Qeyd edib ki, bununla yanaşı, çəki azalması və ümumi metabolik sağlamlığın yaxşılaşması da xəstəliyin gedişatında müsbət rol oynayan əsas amillərdən biri kimi qiymətləndirilir. Lakin mütəxəssislər vurğulayırlar ki, bu sahədə daha dəqiq nəticələr əldə etmək və preparatların birbaşa miqren müalicəsində tətbiqini rəsmiləşdirmək üçün gələcək genişmiqyaslı klinik tədqiqatlara ehtiyac var.