Kent Universitetində fövqəladə tibbi mərkəz yaradılıb

Kent Universitetindəki fövqəladə tibbi mərkəzin qarşısında uzun növbələr yaranıb. Buna səbəb yüzlərlə insanın meningit epidemiyasının yayılmasının qarşısını almaq üçün antibiotik qəbul etməyə çağırılmasıdır.

Azmedinfo.az "Manchester Evening News"un məlumatına istinadən yazır ki, 18 və 21 yaşlı iki tələbə dünyasını dəyişib, digər 11 nəfərin vəziyyəti isə ağırdır.

Universitetin Senat binası müvəqqəti olaraq tibbi bölmə kimi ayrılıb. Epidemiyanı araşdıran Böyük Britaniya Sağlamlıq Təhlükəsizliyi Agentliyi (UKHSA) bəzi hallarda "meningit B" ştamının təsdiqləndiyini, digər yoluxmalarda isə ştamın növünün "tam nəticələr əldə edildikdən sonra" açıqlanacağını bildirib.

2015-ci ildən əvvəl doğulan gənclərin əksəriyyəti, özəl qaydada peyvənd olunmayıblarsa, "meningit B"-yə qarşı qorunmurlar. Bu peyvənd NHS (Milli Səhiyyə Xidməti) tərəfindən körpələr üçün yalnız 2015-ci ildə tətbiq edilməyə başlanıb.